ប្រព័ន្ធស្ថិតិអត្រានុកូលដ្ឋាន

បណ្ណាល័យ គ.ជ.អ.ប

ពិធីសម្ពោធសាលាជំនាន់ថ្មី នៅភូមិស្វាយព្រហូត ឃ៉ុំគោកព្រីង ស្រុកស្វាយជ្រំ ខេត្តស្វាយរៀង និងពិធីអបអរសាទរខួបអនុស្សាវរីយលើកទី១០ នៃការបង្កើតអង្គការឆាលហ្វានកម្ពុជា

នៅថ្ងៃទី២៧ ខែវិច្ឆិកា ឆ្នាំ២០១៧នេះ ឯកឧត្ដម តូច ប៉ូលីវ៉ា អភិបាលរង នៃគណៈអភិបាលខេត្ត តំណាងឯកឧត្តម ម៉ែន វិបុល អភិបាលខេត្តស្វាយរៀង បានអញ្ជើញចូលរួមក្នុងពិធីសម្ពោធសាលាជំនាន់ថ្មី នៅភូមិស្វាយព្រហូត ឃ៉ុំគោកព្រីង ស្រុកស្វាយជ្រំ ខេត្តស្វាយរៀង និងពិធីអបអរសាទរខួបអនុស្សាវរីយលើកទី១០ នៃការបង្កើតអង្គការឆាលហ្វានកម្ពុជា ក្រោមអធិបតីភាពឯកឧត្តម បណ្ឌិត អ៊ឹម កុច រដ្ឋលេខាធិការ ក្រសួងអប់រំ យុវជន និងកីឡា តំណាងឯកឧត្តមបណ្ឌិតសភាចារ្យ ហង់ ជួនណារ៉ុង រដ្ឋមន្ត្រីក្រសួងអប់រំ យុវជន និងកីឡា ។

សូមបញ្ជាក់ថា សាលាជំនាន់ថ្មី ជាការអប់រំសម្រាប់សតវត្សទី២១ ដែលមានបទដ្ឋានគុណភាពខ្ពស់ និងមានការចូលរួមពីគ្រប់សមាសភាពពាក់ព័ន្ធទាំងអស់ក្នុងឃុំ មានហេដ្ឋារចនាសម្ព័ន្ធទំនើប គ្រូមានគុណភាព ភាពជាអ្នកដឹកនាំសកម្មរបស់សហគមន៍ និងការចូលរួមពីកុមារ ដែលជំរុញឲ្យកុមារនៅពេលអនុវត្តពេញលេញអាចសម្រេចបានលទ្ធផលលេចធ្លោសម្រាប់កុមារនៅក្នុងលទ្ធផលសិក្សារបស់ពួកគេ ព្រមទាំងជួយពួកគេបង្កើតភាពជឿជាក់លើខ្លួនឯង៕

 

 

កិច្ចប្រជុំក្រុមការងារសម្របសម្រួលដោះស្រាយបញ្ហាពាក់ព័ន្ធនឹងការងារស្រូវ អង្ករនៅមូលដ្ឋានខេត្តស្វាយរៀង

អនុវត្តតាមការណែនាំរបស់ ឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង នៅក្នុងកិច្ចប្រជុំបូកសរុបលទ្ធផលការងារប្រចាំខែវិច្ឆិកាកាលពីពេលកន្លងទៅ នាព្រឹកថ្ងៃទី២៧ ខែវិច្ឆិកា ឆ្នាំ២០១៧នេះ នៅសាលប្រជុំមន្ទីរកសិកម្ម រុក្ខាប្រមាញ់ និងនេសាទខេត្ត មានរៀបចំកិច្ចប្រជុំក្រុមការងារសម្របសម្រួលដោះស្រាយបញ្ហាពាក់ព័ន្ធនឹងការងារស្រូវ អង្ករនៅមូលដ្ឋានខេត្តស្វាយរៀង ដើម្បីពិនិត្យអំពីការប្រមូលផលស្រូវ តម្លៃ ការចរាចរស្រូវ បណ្តាញប្រមូលទិញ និងសម្រួលដល់ការលក់ទៅកាន់ទីផ្សារនៅប្រទេសជិតខាង ក្រោមអធិបតីភាពឯកឧត្តម ពេជ សាវ៉ាន់ អភិបាលរង នៃគណៈអភិបាលខេត្តស្វាយរៀង និងមានការអញ្ជើញចូលរួមពីគ្រប់មន្ទីរពាក់ព័ន្ធ អភិបាលក្រុង ស្រុក វិស័យឯកជនពាក់ព័ន្ធនឹងស្រូវ អង្ករ និងតំណាងមីក្រូហិរញ្ញវត្ថុនៅក្នុងខេត្ត ។

នៅក្នុងកិច្ចប្រជុំនេះ តាងនាមឯកឧត្ដម ម៉ែន វិបុល អភិបាល នៃគណៈអភិបាលខេត្ត ឯកឧត្តម ពេជ សាវ៉ាន់ អភិបាលរង នៃគណៈអភិបាលខេត្តស្វាយរៀង បានដាក់ចេញនូវទិសដៅ និងយុទ្ធសាស្ត្រគន្លឹះមួយចំនួន ដើម្បីជួយអន្តរាគមន៍លើទីផ្សារស្រូវ អង្ករ ដូចខាងក្រោម ៖

១-អាជ្ញាធរដែនដី និងអង្គភាពពាក់ព័ន្ធទាំងផ្នែករដ្ឋ និងផ្នែកឯកជន ត្រូវបន្តរួមគ្នាធ្វើការសម្របសម្រួល ដើម្បីធានានូវការគ្រប់គ្រងស្ថានភាពទីផ្សារស្រូវ-អង្ករឲ្យបានល្អ និងមានប្រសិទ្ធភាពសេដ្ឋកិច្ច ។

២-គ្រប់មន្ទីរ-អង្គភាពពាក់ព័ន្ធ និងអាជ្ញាធរក្រុង ស្រុក ត្រូវសហការពិនិត្យលទ្ធភាពរៀបចំបណ្ដាញកសិករ អាជីវករ ដើម្បីប្រមូលផ្ដុំគ្នាទិញ លក់ស្រូវនៅតាមទីតាំងសំខាន់ៗមួយចំនួននៅមូលដ្ឋាន ។

៣-ត្រូវបន្តការសហការឲ្យបានល្អប្រសើរជាមួយអាជ្ញាធរខេត្តនៃប្រទេសជិតខាង ដើម្បីជួយសម្រួលដល់ការប្រមូលទិញស្រូវ និងកសិផលផ្សេងៗទៀតរបស់កសិករ ។

៤-ត្រូវមានវិធានការឲ្យមានប្រសិទ្ធភាព និងទប់ស្កាត់នូវរាល់ការបង់កម្រៃមិនផ្លូវការដែលនាំឲ្យថ្លៃកសិផលធ្លាក់ចុះទាប នាំឲ្យប្រជាកសិករមានការខាតបង់ និងរារាំងដល់ការអនុវត្តយុទ្ធសាស្ត្រលើកស្ទួយទីផ្សារកសិផលរបស់ខេត្ត ៕

 

វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តស្វាយរៀង លើកទី៤ អាណត្តិទី២នៅបរិវេណវត្តបន្ទាយ ឃុំកណ្ដៀងរាយ ស្វាយទាប

នាព្រឹកថ្ងៃទី២៧ ខែវិច្ឆិកា ឆ្នាំ២០១៧នេះ រដ្ឋបាលខេត្តស្វាយរៀង បានរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តស្វាយរៀង លើកទី៤ អាណត្តិទី២ នៅបរិវេណវត្តបន្ទាយ ឃុំកណ្ដៀងរាយ ស្វាយទាប ក្រោមអធិបតីភាពឯកឧត្តម ភិន ឆាំ សមាជិកក្រុមប្រឹក្សាខេត្ត និងឯកឧត្តម ហ៊ូ វតនៈ អភិបាលរង នៃគណៈអភិបាលខេត្តស្វាយរៀង ព្រមទាំងវត្តមានអញ្ជើញចូលរួមពីសំណាក់ឯកឧត្ដម សមាជិកក្រុមប្រឹក្សាខេត្ត ប្រធានមន្ទីរ-អង្គភាពនានា ប្រធានក្រុមប្រឹក្សា និងសមាជិកក្រុមប្រឹក្សាស្រុក គណៈអភិបាលស្រុក លោក លោកស្រី ប្រធាន និងសមាជិកក្រុមប្រឹក្សាឃុំ ព្រមទាំងប្រជាពលរដ្ឋនៅក្នុងស្រុកស្វាយទាប សរុបចំនួន ៣២៧នាក់ដោយផ្ដោតលើប្រធានបទសំខាន់ៗមួយចំនួន ដូចជា ៖
១.ការអនុវត្តគោលនយោបាយភូមិ ឃុំ មានសុវត្ថិភាព 
២.ការងារអភិវឌ្ឍន៍មូលដ្ឋាន ការផ្ដល់សេវាសាធារណៈ ការសាងសង់ស្ពាន ការសាងសង់មណ្ឌលសុខភាព
៣.ការធ្វើអត្តសញ្ញាណប័ណ្ណ ការចុះសំបុត្រអត្រានុកូលដ្ឋាន បរិស្ថាន អនាម័យ អគ្គិសនី និងទំនាស់ដីធ្លី៕

ពិធីសច្ចាប្រណិធាន និងបំពាក់កន្សែងជូនមេដឹកនាំកាយរឹទិ្ធ មកពីក្រុមប្រឹក្សា និងគណៈកម្មាធិការប្រតិបតិ្តកាយរឹទិ្ធជាតិកម្ពុជាក្រុង ស្រុកទាំង៨ នៅទូទាំងខេត្តស្វាយរៀង

នៅសាលប្រជុំសាលាខេត្ត នាព្រឹកថ្ងៃទី២៤ ខែវិច្ឆិកា ឆ្នាំ២០១៧នេះ ឯកឧត្ដម ម៉ែន វិបុល អភិបាល នៃគណៈអភិបាលខេត្ត និងជាប្រធានក្រុមប្រឹក្សាកាយរឹទ្ធិជាតិកម្ពុជាខេត្តស្វាយរៀង បានអញ្ជើញជាអធិបតីក្នុងពិធីសច្ចាប្រណិធាន និងបំពាក់កន្សែងជូនមេដឹកនាំកាយរឹទិ្ធ មកពីក្រុមប្រឹក្សា និងគណៈកម្មាធិការប្រតិបតិ្តកាយរឹទិ្ធជាតិកម្ពុជាក្រុង ស្រុកទាំង៨ នៅទូទាំងខេត្តស្វាយរៀង ។

មានប្រសាសន៍ក្នុងឱកាសនេះ ឯកឧត្ដម ម៉ែន វិបុល ប្រធានក្រុមប្រឹក្សាកាយរឹទ្ធិជាតិកម្ពុជាខេត្ត បានសម្ដែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងសមាជិកកាយរឹទ្ធិទាំងអស់នៅក្នុងខេត្ត ដែលកន្លងមកបានខិតខំប្រឹងប្រែង លះបង់កម្លាំងកាយចិត្តចូលរួមយ៉ាងសកម្មអនុវត្តតួនាទីភារកិច្ច ប្រកបដោយការសហការ និងសាមគ្គីភាព ធ្វើឲ្យសកម្មភាពកាយរឹទ្ធិជាតិកម្ពុជាខេត្ត មានចលនាផុលផុស ដែលបានចូលរួមចំណែកក្នុងការអភិវឌ្ឍកុមារ និងយុវជនឲ្យមានសក្ដានុពលពេញលេញ ក្លាយទៅជាពលរដ្ឋដែលមានទំនួលខុសត្រូវ និងក្លាយទៅជាសមាជិកគំរូនៅក្នុងសហគមន៍មូលដ្ឋាន ស្របតាមគោលបំណង បេសកម្ម និងគោលការណ៍គ្រឹះរបស់កាយរឹទ្ធិជាតិកម្ពុជា ឆ្លើយតបទៅនឹងការយកចិត្តទុកដាក់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាគរុគណនៃកាយរឹទ្ធិជាតិកម្ពុជា ដែលជានិច្ចកាលសម្ដេចទាំងពីរ លោកតែងតែបានជួយឧបត្ថម្ភគាំទ្រដល់ដំណើរការរបស់កាយរឹទ្ធិជាតិគ្រប់លំដាប់ថ្នាក់ឲ្យពង្រឹងបាននូវតួនាទី និងគំរូល្អនៅក្នុងសង្គម ។

ទន្ទឹមនេះ ឯកឧត្ដមប្រធាន ក៏បានធ្វើការផ្ដាំផ្ញើដល់ថ្នាក់ដឹកនាំកាយរឹទ្ធិជាតិកម្ពុជាខេត្ត ជាពិសេសថ្នាក់ដឹកនាំកាយរឹទ្ធិក្រុង ស្រុក ដែលទើបធ្វើសច្ចាប្រណិធាន និងបំពាក់កន្សែងនៅថ្ងៃនេះ នូវកិច្ចការសំខាន់ៗមួយចំនួន ដូចខាងក្រោម ៖
១-ត្រូវខិតខំពង្រីកសមាជិកភាព ដែលជាកម្លាំងនៃចលនាកាយរឹទ្ធិឲ្យបានកាន់តែច្រើនថែមទៀត ជាពិសេសនៅតាមបណ្ដាគ្រឹះស្ថានអប់រំនានាក្នុងខេត្ត ។
២-ត្រូវបន្តរៀបចំចងក្រងប្រព័ន្ធល្បាត កង និងកងឯកភាពឲ្យបានសមស្របតាមលក្ខណៈបច្ចេកទេសកាយរឹទ្ធិក្នុងជួរយុវជន ។
៣-ត្រូវបន្តបំផុសសកម្មភាពស្ម័គ្រចិត្ត ពង្រឹងសកម្មភាពធ្វើអំពើល្អ និងការអប់រំសីលធម៌ ព្រមទាំងជំរុញឲ្យសមាជិកកាយរឹទ្ធិគ្រប់រូបចូលរួមចំណែកឲ្យកាន់តែសកម្ម ដើម្បីកាត់បន្ថយអំពើអសកម្មនានានៅក្នុងសង្គម ។
៤-ត្រូវបន្តអនុវត្តតួនាទីភារកិច្ចរបស់ខ្លួនឲ្យបានខ្ជាប់ខ្ជួនស្របតាមគោលបំណង គោលការណ៍ និងវិធីនៃចលនាកាយរឹទ្ធិ ព្រមទាំងត្រូវបន្តពង្រឹងការគោរពវិន័យ ច្បាប់កាយរឹទ្ធិ និងពង្រីកការធ្វើអំពើល្អ សំដៅកសាងជនគំរូ ក្នុងជួរយុវជនឲ្យបានកាន់តែច្រើនឡើង ដើម្បីឲ្យសមាជិកកាយរឹទ្ធិទាំងអស់ក្លាយជាពលរដ្ឋល្អ និងមានសមត្ថភាពគ្រប់គ្រាន់ មានស្មារតីទទួលខុសត្រូវខ្ពស់ និងជាអ្នកបន្តវេនដ៏មានប្រសិទ្ធភាពក្នុងកិច្ចការអភិវឌ្ឍសហគមន៍ និងប្រទេសជាតិ។

សូមបញ្ជាក់ថា ការបំពាក់កន្សែងដល់មេដឹកនាំកាយរឹទិ្ធ នាពេលនេះ គឺជាការរៀបចំរចនាសម្ព័ន្ធកាយរឹទិ្ធជាតិកម្ពុជា ថ្នាក់ក្រុង ស្រុក ទូទាំងខេត្តស្វាយរៀង ហើយមេដឹកនាំកាយរឹទិ្ធដែលត្រូវបានជ្រើសរើសឲ្យចូលរួមជីវភាពកាយរឹទិ្ធ និងត្រូវបំពាក់កន្សែងនៅថ្ងៃនេះ គឺសុទ្ធសឹងតែជាធនធានមនុស្ស ប្រកបដោយសក្តានុពល និងមានសមត្ថភាពពេលលេញ ដើម្បីគ្រប់គ្រងដឹកនាំអង្គភាពកាយរឹទិ្ធ និងជួយរៀបចំកម្មវិធីយុវជន សកម្មភាពផ្សេងៗ បម្រើឲ្យផលប្រយោជន៍យុវជន សហគមន៍ និងប្រទេសជាតិ ៕

 

ព័ត៌មានថ្មីៗ

យុទ្ធសាស្ត្រចតុកោណ(ដ៣)

ចំនួនអ្នកទស្សនា

ថ្ងៃនេះ 0

ម្សិលមិញ 4

សប្តាហ៍ 15

ខែ 78

សរុប 5545