ប្រព័ន្ធស្ថិតិអត្រានុកូលដ្ឋាន

បណ្ណាល័យ គ.ជ.អ.ប

ពិធីសំណេះសំណាលជាមួយមន្ត្រីរាជការ និងមន្ត្រីជាប់កិច្ចសន្យាសាលាខេត្ត

នារសៀលថ្ងៃសុក្រ ១២កើត ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៩ ខែធ្នូ ឆ្នាំ២០១៧នេះ នៅសាលប្រជុំធំសាលាខេត្តស្វាយរៀង មានរៀបចំពិធីសំណេះសំណាលជាមួយមន្ត្រីរាជការ និងមន្ត្រីជាប់កិច្ចសន្យាសាលាខេត្ត ក្រោមអធិបតីភាពឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង និងមានការអញ្ជើញចូលរួមពីឯកឧត្ដមអភិបាលរងខេត្ត លោក លោកស្រីនាយក នាយករងរដ្ឋបាលសាលាខេត្ត លោក លោកស្រីនាយក នាយករងទីចាត់ ប្រធាន អនុប្រធានអង្គភាព ប្រធាន អនុប្រធានការិយាល័យ មន្ត្រីរាជការ និងមន្រ្តីជាប់កិច្ចសន្យាសាលាខេត្ត សរុប ១៤៦នាក់ ។
ពិធីសំណេះសំណាលនេះរៀបចំឡើងក្នុងគោលបំណងដើម្បីរឹតចំណងមិត្តភាព សាមគ្គីភាព បង្កើតភាពស្និតស្នាលរវាងថ្នាក់ដឹកនាំ និងមន្ត្រីរាជការ និងរវាងមន្ត្រីរាជការ និងមន្ត្រីរាជការទាំងអស់ ក៏ដូចជាដើម្បីស្វាគមន៍ការឈានមកដល់នៃឆ្នាំថ្មី ឆ្នាំសកល ២០១៨ ។

ក្នុងលក្ខណៈមហាគ្រួសារតែមួយ នៃក្រុមគ្រួសារមន្ត្រីរាជការរដ្ឋបាលខេត្តស្វាយរៀង ឯកឧត្ដម ម៉ែន វិបុល អភិបាល នៃគណៈអភិបាលខេត្ត បានថ្លែងនូវការអរគុណយ៉ាងជ្រាលជ្រៅជាទីបំផុត ចំពោះថ្នាក់ដឹកនាំ មន្ត្រីរាជការ និងមន្ត្រីជាប់កិច្ចសន្យារបស់សាលាខេត្តទាំងអស់ ដែលកន្លងមក បានរួមសាមគ្គីភាព ឯកភាពផ្ទៃក្នុងយ៉ាងល្អប្រសើរ ក្នុងការបំពេញតួនាទីភារកិច្ចរបស់ខ្លួនប្រកបដោយការទទួលខុសត្រូវ នាំឲ្យសម្រេចបាននូវលទ្ធផលដ៏គួរជាទីមោទនៈទាំងការងារអភិវឌ្ឍន៍ខេត្ត ការផ្ដល់សេវារដ្ឋបាលជូនប្រជាពលរដ្ឋ និងការសម្របសម្រួលដោះស្រាយបញ្ហាឆ្លើយតបនឹងតម្រូវការ និងសំណូមពររបស់ប្រជាពលរដ្ឋ ។ ទន្ទឹមនេះ ឯកឧត្ដមអភិបាលខេត្ត ក៏បានថ្លែងនូវការអរគុណផងដែរ ចំពោះលោកទីប្រឹក្សាគ្រប់គ្រងកម្មវិធីជាតិថ្នាក់ខេត្ត លោកទីប្រឹក្សាហេដ្ឋារចនាសម្ព័ន្ធ និងមន្ត្រីព័ត៌មានវិទ្យាថ្នាក់ខេត្ត ដែលនឹងត្រូវបញ្ចប់កិច្ចសន្យានៅដំណាច់ឆ្នាំ២០១៧នេះ ក្នុងរយៈពេលនៃការបំពេញការងាររបស់ខ្លួននារយៈពេលជិត ២ឆ្នាំកន្លងមក បានសហការយ៉ាងល្អប្រសើរជាមួយរដ្ឋបាលខេត្ត ក្នុងការជួយសម្របសម្រួលគាំទ្រដល់ដំណើរការកសាងផែនការអភិវឌ្ឍន៍ និងការអនុវត្តគម្រោងនានានៅមូលដ្ឋានឲ្យប្រព្រឹត្តទៅបានត្រឹមត្រូវ ស្របតាមផែនការ ជាពិសេសបានជួយសម្របសម្រួលដល់ការបណ្ដុះបណ្ដាល និងពង្រឹងសមត្ថភាពរបស់មន្ត្រីរាជការទាំងនៅថ្នាក់ខេត្ត ថ្នាក់ក្រុង ស្រុក និងឃុំ សង្កាត់ ។

ក្នុងឱកាសនេះផងដែរ ឯកឧត្ដមអភិបាលខេត្ត ក៏មានមតិផ្ដាំផ្ញើដល់មន្ត្រីរាជការទាំងអស់ត្រូវបន្តខិតខំពង្រឹងសាមគ្គីភាព ឯកភាពផ្ទៃក្នុងឲ្យកាន់តែល្អប្រសើរ ត្រូវបង្កើនការសហការ និងមានទំនាក់ទំនងល្អរវាងគ្នាក្នុងការបំពេញតួនាទីភាកិច្ចដើម្បីលទ្ធផល និងប្រសិទ្ធភាពការងាររបស់រដ្ឋបាលខេត្ត ត្រូវបន្តខិតខំយកចិត្តទុកដាក់អនុវត្តតួនាទីភារកិច្ចស្នូលរបស់ខ្លួនឲ្យបានត្រឹមត្រូវ ស្របតាមច្បាប់ លិខិតបទដ្ឋានគតិយុត្ត និងលក្ខខណ្ឌការងារដែលបានកំណត់ ត្រូវបន្តខិតខំយកចិត្តទុកដាក់ផ្ដល់សេវារដ្ឋបាលជូនប្រជាពលរដ្ឋឲ្យបានទាន់ពេលវេលា ប្រកបដោយគុណភាព ប្រសិទ្ធភាព និងប្រសិទ្ធផល ត្រូវគោរពម៉ោងពេលចូលបម្រើការងារឲ្យបានទៀងទាត់ ជាពិសេសត្រូវខិតខំស្វែងយល់សិក្សា និងរៀនសូត្រពីចំណេះដឹងថ្មីៗបន្ថែមទៀតឲ្យបានជាប់ជាប្រចាំ ដើម្បីពង្រឹង និងបង្កើនសមត្ថភាពរបស់ខ្លួនឯងផង និងដើម្បីបង្កើននូវផលិតភាពការងាររបស់អង្គភាពផង ។

នៅចុងបញ្ចប់ឯកឧត្តមអភិបាលខេត្ត បានឧបត្ថម្ភថវិកាជូនមន្ត្រីរាជការ និងមន្ត្រីជាប់កិច្ចសន្យាសាលាខេត្ត សរុបចំនួន ១៤៦នាក់ ម្នាក់ៗទទួលបានថវិកា ១០ម៉ឺនរៀល ដោយឡែកសម្រាប់លោកទីប្រឹក្សាគ្រប់គ្រងកម្មវិធីជាតិថ្នាក់ខេត្ត និងសហការីសរុបចំនួន ៣នាក់ ម្នាក់ៗទទួលបានប័ណ្ណសរសើររបស់រដ្ឋបាលខេត្ត ១ កាដូវត្ថុអនុស្សាវរីយ៍ ១ និងថវិកា ១០ម៉ឺនរៀល ៕

កិច្ចប្រជុំសាមញ្ញលើកទី៤៣ ឆ្នាំទី៤ អាណត្តិទី២ របស់ក្រុមប្រឹក្សាខេត្ត

នាព្រឹកថ្ងៃសុក្រ ១២កើត ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៩ ខែធ្នូ ឆ្នាំ២០១៧នេះ នៅសាលប្រជុំសាលាខេត្តស្វាយរៀង មានរៀបចំកិច្ចប្រជុំសាមញ្ញលើកទី៤៣ ឆ្នាំទី៤ អាណត្តិទី២ របស់ក្រុមប្រឹក្សាខេត្តស្វាយរៀង ក្រោមអធិបភាពឯកឧត្ដមបណ្ឌិត គឹម ធា ប្រធានក្រុមប្រឹក្សាខេត្ត និងមានការអញ្ជើញចូលរួមពីសំណាក់ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង និងឯកឧត្ដមអភិបាលរងខេត្ត ឯកឧត្ដម លោកជំទាវសមាជិក សមាជិកាក្រុមប្រឹក្សាខេត្ត លោក លោកស្រីនាយក នាយករងរដ្ឋបាល លោក លោកស្រីនាយក នាយករងទីចាត់ការ/អង្គភាព និងប្រធានការិយាល័យសាលាខេត្ត ៕ របៀបវារៈនៃកិច្ចប្រជុំនេះ រួមមាន ៖
១.អនុម័តលើសេចក្ដីព្រាងរបៀបវារៈនៃកិច្ចប្រជុំ
២.ការពិនិត្យអនុម័តលើសេចក្ដីព្រាងកំណត់ហេតុកិច្ចប្រជុំសាមញ្ញលើកទី៤២
៣.ការអនុម័តរបាយការណ៍បូកសរុបលទ្ធផលការងារប្រចាំខែធ្នូ ឆ្នាំ២០១៧ និងទិសដៅការងារខែមករា ឆ្នាំ២០១៨ របស់រដ្ឋបាលខេត្ត
៤.ស្ដាប់របាយការណ៍ប្រចាំខែធ្នូ ឆ្នាំ២០១៧ និងទិសដៅការងារខែមករា ឆ្នាំ២០១៨ របស់ គកសក ខេត្ត
៥.ស្ដាប់របាយការណ៍ប្រចាំខែធ្នូ ឆ្នាំ២០១៧ និងទិសដៅការងារខែមករា ឆ្នាំ២០១៨ របស់គណៈកម្មាធិការលទ្ធកម្មរដ្ឋបាលខេត្ត
៦.ការអនុម័តសេចក្ដីព្រាងសេចក្ដីសម្រេចស្ដីពីការកែសម្រួលសមាសភាពគណៈកម្មការរៀបចំគម្រោងខេត្ត
៧.ការអនុម័តសេចក្ដីព្រាងសេចក្ដីសម្រេចស្ដីពីការកែសម្រួលសមាសភាពគណៈកម្មាធិការលទ្ធកម្មរដ្ឋបាលខេត្ត
៨.ការអនុម័តសេចក្ដីព្រាងសេចក្ដីសម្រេចស្ដីពីការកែសម្រួលសមាសភាពគណៈកម្មាធិការសម្របសម្រួលបច្ចេកទេសរបស់ក្រុមប្រឹក្សាខេត្ត
៩.ការអនុម័តសេចក្ដីព្រាងស្ដីពីការបែងចែកប្រាក់រង្វាន់លើកទឹកចិត្តមន្ត្រីរាជការ
១០.ការបោះឆ្នោតលើការការតែងតាំង និងប្រគល់ភារកិច្ចជូនមន្ត្រីរាជការ
១១.សេចក្ដីផ្សេងៗ (កិច្ចប្រជុំសាមញ្ញក្រុមប្រឹក្សាខេត្តលើកទី៤៤ ប្រព្រឹត្តទៅនៅថ្ងៃទី៣០ ខែមករា ឆ្នាំ២០១៨) ៕

គណៈអភិបាល និងជាប្រធានអនុគណៈកម្មការសុវត្ថិភាពចរារណ៍ផ្លូវគោកខេត្តស្វាយរៀង បានអញ្ជើញជាអធិបតីក្នុងពិធីចែកមួក សុវត្ថិភាពចំនួន ២០០មួក ដល់បងប្អូនប្រជាពលរដ្ឋ

នៅព្រឹកថ្ងៃសុក្រ១២កើត ខែបុស្ស ឆ្នាំរកានព្វស័ក ព.ស២៥៦១ ត្រូវនិងថ្ងៃទី២៩ ខែធ្នូ ឆ្នាំ២០១៧នេះ ឯកឧត្តម ម៉ែន វិបុល អភិបាល នៃគណៈអភិបាល និងជាប្រធានអនុគណៈកម្មការសុវត្ថិភាពចរារណ៍ផ្លូវគោកខេត្តស្វាយរៀង បានអញ្ជើញជាអធិបតីក្នុងពិធីចែកមួក សុវត្ថិភាពចំនួន ២០០មួក ដល់បងប្អូនប្រជាពលរដ្ឋដែលបើកបរម៉ូតូមិនពាក់មួកសុវត្ថិភាព និងទទួលការផាកពិន័យពីសមត្ថកិច្ចចរាចរណ៍ផ្លូវគោកខេត្ត នៅចំណុចសួនពោធិ៍ព្រឹក ក្រុងស្វាយរៀង ។ ពិធីនេះមានការអញ្ជើញចូលរួមពីសំណាក់លោកជំទាវ ពៅ សុភាព អភិបាលរងខេត្ត លោកឧត្ដមសេនីយ៍ទោ កឹង ឃន ស្នងការនរគបាលខេត្ត លោកស្នងការរងទទួលផែនចរាចរណ៍ផ្លូវគោកខេត្ត លោកអភិបាលក្រុងស្វាយរៀង លោកប្រធានមន្ទីរសាធារណការ និងដឹកជញ្ជូនខេត្ត និងលោក លោកស្រី ប្រធានមន្ទីរអង្គភាពនានាក្នុងខេត្ត ។

មានប្រសាសន៍ក្នុងឱកាសនោះឯកឧត្តមអភិបាលខេត្ត បានលើកឡើងថា បច្ចុប្បន្នគ្រោះថ្នាក់ចរាចរណ៍ផ្លូវគោកគឺជាឃាតករលាក់មុខដែលពួនស្ទាក់នៅលើដងផ្លូវគ្រប់វិនាទី ដែលធ្វើឲ្យមានការខាតបង់ ការនិរាស ព្រាត់ប្រាស់ បាត់បង់មនុស្សជាទីស្រឡាញ់ ព្រមទាំងបន្សល់ទុកនូវសោកនាដកម្មដល់គ្រួសារ និងសង្គម ។ មានកត្តាជាច្រើនត្រូវបានរកឃើញដូចជា កត្តាមនុស្ស កត្តាផ្លូវ កត្តាយានយន្ត និងកត្តាបរិស្ថាន​ដែលក្នុងនោះ កត្តាមនុស្សមានរហូតដល់ជាង ៩០% ។

ឃាតករលាក់មុខដែលបានឆក់យកអាយុជីវិតមនុស្សស្ទើររាល់ថ្ងៃនេះវាបានកើតឡើងដោយសារមនុស្សជាអ្នកប្រព្រឹត្ត ដូចនេះការកែប្រែឥរិយាបទរបស់មនុស្សពិតជាអាចធ្វើឲ្យមានការផ្លាស់ប្តូរនូវសោកនាដកម្មមួយនេះជាក់ជាមិនខាន។

ឯកឧត្តមបានផ្តាំផ្ញើដល់អ្នកប្រើប្រាស់ផ្លូវទាំងអស់ ត្រូវចូលរួមគោរពច្បាប់ចរាចរណ៍ ត្រូវមានការយោគយល់ និងអធ្យាស្រ័យគ្នារាល់ការបើកបរនៅលើដងផ្លូវ។ អ្នកបើកបរគ្រប់រូបត្រូវប្រាកដថា អ្នកមិនបើកបរហួសល្បឿនកំណត់ មិនបើកបរក្រោយពេលហូបគ្រឿងស្រវឹង ត្រូវពាក់មួកសុវត្ថិភាពគ្រប់ពេលធ្វើដំណើរតាមម៉ូតូ ប្រើប្រាស់ខ្សែក្រវ៉ាត់សុវត្ថិភាព ពេលធ្វើដំណើរតាមរថយន្តជាដើម ៕

ការផ្សព្វផ្សាយសមិទ្ធផលសំខាន់ៗរបស់ព្រឹទ្ធសភា និងភាពជាតំណាងរបស់ក្រុមសមាជិកព្រឹទ្ធសភាភូមិភាគទី៦

នាព្រឹកថ្ងៃព្រហស្បតិ៍ ១១កើត ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៨ ខែធ្នូ ឆ្នាំ២០១៧នះ ឯកឧត្ដមបណ្ឌិត គឹម ធា ប្រធានក្រុមប្រឹក្សាខេត្ត បានអញ្ជើញចូលរួមក្នុងវេទិកាស្តីពី "ការផ្សព្វផ្សាយសមិទ្ធផលសំខាន់ៗរបស់ព្រឹទ្ធសភា និងភាពជាតំណាងរបស់ក្រុមសមាជិកព្រឹទ្ធសភាភូមិភាគទី៦" ក្រោមអធិបតីភាព លោកជំទាវ មាន សំអាន ប្រធានក្រុមសមាជិកព្រឹទ្ធសភាប្រចាំភូមិភាគទី៦ នៅវត្តរោទិ៍ ឃុំញរ ស្រុកកំពង់រោទិ៍ ។

ក្នុងវេទិកានេះ មានការអញ្ជើញចូលរួមពីក្រុមប្រឹក្សាស្រុក គណៈអភិបាលស្រុក និងក្រុមប្រឹក្សាឃុំនៃស្រុកចំនួនពីរ គឺស្រុកកំពង់រោទិ៍ និងស្រុកចន្ទ្រា ៕

 

ព័ត៌មានថ្មីៗ

យុទ្ធសាស្ត្រចតុកោណ(ដ៣)

ចំនួនអ្នកទស្សនា

ថ្ងៃនេះ 0

ម្សិលមិញ 3

សប្តាហ៍ 15

ខែ 105

សរុប 5899