ប្រព័ន្ធស្ថិតិអត្រានុកូលដ្ឋាន

បណ្ណាល័យ គ.ជ.អ.ប

ការពិភាក្សាការងារពាក់ព័ន្ធនឹងការពង្រឹងនីតិវិធីនៃការគ្រប់គ្រងបច្ចេកទេសសុវត្ថិភាពស្ថានីយប្រេងឥន្ធនៈ

ការិយាល័យឯកឧត្ដមអភិបាលខេត្ត៖ នាព្រឹកថ្ងៃទី១៣ ខែវិច្ឆិកា ឆ្នាំ២០១៧នេះ ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង បានទទួលជួបគណៈប្រតិភូក្រសួងរ៉ែ និងថាមពល ដឹកនាំដោយឯកឧត្ដម ឌិត ទីណា រដ្ឋលេខាធិការក្រសួងរ៉ែ និងថាមពល ដើម្បីពិភាក្សាការងារពាក់ព័ន្ធនឹងការពង្រឹងនីតិវិធីនៃការគ្រប់គ្រងបច្ចេកទេសសុវត្ថិភាពស្ថានីយប្រេងឥន្ធនៈ ព្រមទាំងការងារត្រៀមរៀបចំសិក្ខាសាលាផ្សព្វផ្សាយសារាចរស្ដីពីសុវត្ថិភាពសម្រាប់ការរៀបចំស្ថានីយប្រេងឥន្ធនៈ ស្ថានីយឧស្ម័នឥន្ធនៈ និងស្ថានីយរួមប្រេងនិងឧស្ម័នឥន្ធនៈ និងប្រកាសស្ដីពីនីតិវិធីនៃ ការគ្រប់គ្រងបច្ចេកទេសសុវត្ថិភាពស្ថានីយប្រេងឥន្ធនៈ ស្ថានីយឧស្ម័នឥន្ធនៈ និងស្ថានីយរួមប្រេងនិងឧស្ម័នឥន្ធនៈ ជូនដល់កងកម្លាំង មន្ទីរ-អង្គភាពពាក់ព័ន្ធ និងរដ្ឋបាលក្រុង ស្រុក ដែលគ្រោងនឹងរៀបចំនៅថ្ងៃទី១៤ ខែវិច្ឆិកា ឆ្នាំ២០១៧ ។

នៅក្នុងជំនួបពិភាក្សានេះ ក៏មានការចូលរួមពីឯកឧត្ដមអភិបាលរងខេត្ត លោកស្រីនាយករងរដ្ឋបាលសាលាខេត្ត លោកប្រធានមន្ទីររ៉ែ និងថាមពលខេត្ត និងលោកនាយកទីចាត់ការអន្តរវិស័យសាលាខេត្ត ផងដែរ ៕

ពិធីបិទការប្រកួតបាល់ទាត់ពានរង្វាន់ស្វាយរៀងខាប់ លើកទី៣ ឆ្នាំ២០១៧

នាល្ងាចថ្ងៃទី១២ ខែវិច្ឆិកា ឆ្នាំ២០១៧នេះ ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង និងឯកឧត្ដម ឌី វិជ្ជា ប្រធានសហភាពសហព័ន្ធយុវជនកម្ពុជាខេត្ត បានអញ្ជើញជាអធិបតីក្នុងពិធីបិទការប្រកួតបាល់ទាត់ពានរង្វាន់ស្វាយរៀងខាប់ លើកទី៣ ឆ្នាំ២០១៧ និងការប្រកួតវគ្គផ្ដាច់ព្រ័ត្រដណ្ដើមជើងឯក រវាងក្រុមបាល់ទាត់ធារីលីងគួយ និងក្រុមបាល់ទាត់ស.ស.យ.កស្រុករមាសហែក នៅពហុកីឡដ្ឋានខេត្តស្វាយរៀង ដែលសហការរៀបចំដោយសមាគមកីឡាបាល់ទាត់ខេត្តស្វាយរៀង និងសហភាពសហព័ន្ធយុវជនកម្ពុជាខេត្ត ។

ក្នុងពិធីនេះមានការអញ្ជើញចូលរួមពីឯកឧត្ដមអភិបាលរងខេត្ត ថ្នាក់ដឹកនាំសហភាពសហព័ន្ធយុវជនកម្ពុជាខេត្ត បងប្អូនប្រជាពលរដ្ឋ យុវជន យុវនារី ទស្សនិកជន និងអ្នកស្នេហាវិស័យកីឡាបាល់ទាត់យ៉ាងច្រើនកុះករ ។

ក្នុងឳកាសនោះ ឯកឧត្ដមអភិបាលខេត្ត បានឧបត្ថម្ភដល់ក្រុមការងារផ្សាយផ្ទាល់របស់ស្ថានីយ៍ទូរទស្សន៍បាយ័នព័ត៌មាន ថវិកា ២លានរៀល ក្រុមអាជ្ញាកណ្ដាលដែលចូលរួមកាត់សេចក្ដីក្នុងការប្រកួតថវិកា ២លានរៀល និងឧបត្ថម្ភដល់គណៈកម្មការរៀបចំការប្រកួត ថវិកា ១លានរៀល ។

សូមបញ្ជាក់ថា ព្រឹត្តិការណ៍នៃការប្រកួតបាល់ទាត់ពានរង្វាន់ស្វាយរៀងខាប់ លើកទី៣ ឆ្នាំ២០១៧នេះ បានចាប់ផ្ដើមនៅថ្ងៃទី២១ ខែកក្កដា ឆ្នាំ២០១៧ និងបញ្ចប់នៅល្ងាចថ្ងៃទី១២ ខែវិច្ឆិកា ឆ្នាំ២០១៧ ដែលក្រុមបាល់ទាត់ជ័យលាភីចំណាត់ថ្នាក់លេខ១ បានទៅលើក្រុមបាល់ទាត់ធារីលីងគួយ ទទួលបានមេដាយមាស ១ ពានរង្វាន់ ១ និងថវិកា ៦លានរៀល ចំណាត់ថ្នាក់លេខ២ បានទៅលើក្រុមបាល់ទាត់ស.ស.យ.កស្រុករមាសហែក ទទួលបានមេដាយប្រាក់ ១ និងថវិកា ៣លានរៀល និងចំណាត់ថ្នាក់លេខ៣ បានទៅលើក្រុមបាល់ទាត់ផេនដាហ្វេសស៊ី ទទួលបានមេដាយសំរិទ្ធិ ១ និងថវិកា ១លាន៥សែនរៀល និងចំណាត់ថ្នាក់លេខ៤ បានទៅលើក្រុមបាល់ទាត់ស.ស.យ.កស្រុកស្វាយរៀង ទទួលបានថវិកាលើកទឹកចិត្ត ១លាន៥សែនរៀល ៕

កិច្ចប្រជុំតាមដានពង្រឹងការអនុវត្ត និងផ្សព្វផ្សាយស្ដីពីការអនុវត្តវិធានការបង្ក្រាបល្បែងស៊ីសងខុសច្បាប់ នៅក្នុងខេត្តស្វាយរៀង

នាព្រឹកថ្ងៃទី១០ ខែវិច្ឆិកា ឆ្នាំ២០១៧នេះ នៅសាលប្រជុំសាលាខេត្ត មានរៀបចំកិច្ចប្រជុំតាមដានពង្រឹងការអនុវត្ត និងផ្សព្វផ្សាយសេចក្ដីណែនាំលេខ០២៨ សណន និងលេខ០១២ សហវ ចុះថ្ងៃទី០១ ខែកញ្ញា ឆ្នាំ២០១៦ ស្ដីពីការអនុវត្តវិធានការបង្ក្រាបល្បែងស៊ីសងខុសច្បាប់ នៅក្នុងខេត្តស្វាយរៀង ក្រោមអធិបតីភាពឯកឧត្ដមនាយសេនីយ៍សន្តិបណ្ឌិត ឯម សំអាន រដ្ឋលេខាធិការក្រសួងមហាផ្ទៃ និងជាអនុប្រធានគណៈកម្មការចម្រុះបង្ក្រាបការលេងល្បែងកាស៊ីណូ ឆ្នោត-ឡូតូ ភ្នាល់បាល់ ភ្នាល់អនឡាញ និងល្បែងខុសច្បាប់គ្រប់ប្រភេទ ។

ក្នុងកិច្ចប្រជុំមានការអញ្ជើញចូលរួមពីឯកឧត្ដម ម៉ែន វិបុល អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ដស្វាយរៀង ឯកឧត្ដម ហ៊ូ វតនៈ អភិបាលរងខេត្ត ឯកឧត្ដមតំណាងក្រសួងសេដ្ឋកិច្ច និងហិរញ្ញវត្ថុ ប្រតិភូក្រសួងមហាផ្ទៃ លោកឧត្ដមសេនីយ៍ស្នងការនគរបាលខេត្ត លោកវរសេនីយ៍មេបញ្ជាការរងតំបន់ប្រតិបត្តិការសឹករងស្វាយរៀង មេបញ្ជាការរងកងរាជអាវុធហត្ថខេត្ត លោកនាយករងរដ្ឋបាលសាលាខេត្ត លោកអភិបាលក្រុង ស្រុក និងលោក លោកស្រីប្រធានមន្ទីរ-អង្គភាពដែលជាសមាជិកគណៈបញ្ជាការឯកភាពរដ្ឋបាលខេត្ត ៕

សេចក្តីជូនដំណឹងដល់បងប្អូនប្រជាពលរដ្ឋខេត្តស្វាយរៀង ដែលមានរថយន្តត្រូវត្រួតពិនិត្យលក្ខណៈបច្ចេកទេស (ឈៀក)

សេចក្តីជូនដំណឹងដល់បងប្អូនប្រជាពលរដ្ឋខេត្តស្វាយរៀង ដែលមានរថយន្តត្រូវត្រួតពិនិត្យលក្ខណៈបច្ចេកទេស (ឈៀក) កុំភ្លេចនៅថ្ងៃទី១៣ ដល់១៨ ខែវិច្ឆិកា ឆ្នាំ២០១៧នេះ ទីតាំងផ្លូវខាងក្រោយសាលាខេត្តស្វាយរៀង ៕ សូមអរគុណ/

ព័ត៌មានថ្មីៗ

យុទ្ធសាស្ត្រចតុកោណ(ដ៣)

ចំនួនអ្នកទស្សនា

ថ្ងៃនេះ 0

ម្សិលមិញ 4

សប្តាហ៍ 15

ខែ 78

សរុប 5545