ប្រព័ន្ធស្ថិតិអត្រានុកូលដ្ឋាន

បណ្ណាល័យ គ.ជ.អ.ប

ពិធីសម្ពោធដាក់ឲ្យប្រើប្រាស់ជាផ្លូវការនូវអគារថ្មី នៃមន្ទីរពេទ្យបង្អែកខេត្ត ក្រោមអធិបតីភាពឯកឧត្ដមវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល នាព្រឹកថ្ងៃទី១២ ខែតុលា ឆ្នាំ២០១៧

នាព្រឹកថ្ងៃទី១២ ខែតុលា ឆ្នាំ២០១៧នេះ នៅខេត្តស្វាយរៀង មានរៀបចំពិធីសម្ពោធដាក់ឲ្យប្រើប្រាស់ជាផ្លូវការនូវអគារថ្មី នៃមន្ទីរពេទ្យបង្អែកខេត្ត ក្រោមអធិបតីភាពឯកឧត្ដមវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល តំណាងដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងមានការអញ្ជើញចូលរួមពីឯកឧត្ដម ហ៊ីដេហ៊ីសា ហូរីណូអ៊ុជិ (Hidehisa Horinouchi) ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុន ប្រចាំនៅព្រះរាជាណាចក្រកម្ពុជា ឯកឧត្ដម លោកជំទាវរដ្ឋលេខាធិការ អនុរដ្ឋលេខាធិការ អគ្គនាយកក្រសួង-ស្ថាប័នថ្នាក់ជាតិ ឯកឧត្ដមនាយឧត្ដមសេនីយ៍មេបញ្ជាការកងរាជអាវុធហត្ថលើផ្ទៃប្រទេស ឯកឧត្ដម លោកជំទាវសមាជិកក្រុមការងារថ្នាក់ជាតិចុះមូលដ្ឋាននៅខេត្តស្វាយរៀង ក្រុមប្រឹក្សាខេត្ត គណៈអភិបាលខេត្ត ប្រធានមន្ទីរ-អង្គភាព អភិបាលក្រុង ស្រុក កងកម្លាំងប្រដាប់អាវុធទាំងបី មន្ត្រីរាជការ បុគ្គលិកសុខាភិបាល លោកគ្រូ អ្នកគ្រូ យុវជនកាយរឹទ្ធិ យុវជនកាកបាទក្រហម យាយជី តាជី និងបងប្អូនប្រជាពលរដ្ឋសរុបប្រមាណ ៣.០០០នាក់ ។

សូមបញ្ជាក់អគារមន្ទីរពេទ្យបង្អែកខេត្ត ដែលត្រូវដាក់សម្ពោធឲ្យប្រើប្រាស់ជាផ្លូវការនៅថ្ងៃនេះ គឺបានចាប់ផ្ដើមដំណើរការបើកការដ្ឋានសាងសង់នៅថ្ងៃទី១៤ ខែមីនា ឆ្នាំ២០១៦ និងបានបញ្ចប់ជាស្ថាពរនៅថ្ងៃទី៣០ ខែមិថុនា ឆ្នាំ២០១៧ ដែលជាជំនួយឥតសំណងរបស់រដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន JICA ដោយចំណាយថវិកាសាងសង់សរុប ១.០៧៧លានយ៉េន ស្មើនឹង ៩.៦១៦.០៧១ដុល្លារ ។ អគារមន្ទីរពេទ្យថ្មីនេះ មានចំនួន ១ខ្នង កម្ពស់ ៣ជាន់ ស្មើនឹង ១៧,២ម៉ែត្រ និងមានផ្ទៃក្រឡាសំណង់សរុប ៣.១៣៥,៥ម៉ែត្រការ៉េ ដោយចែកចេញជា ៨ផ្នែក គឺផ្នែករដ្ឋបាល ផ្នែកសង្គ្រោះបន្ទាន់ ផ្នែកសម្ភព និងរោគស្ត្រី ផ្នែកវះកាត់ និងប្រពោធនកម្ម ផ្នែករំងាប់មេរោគ និងបោកគក់ ផ្នែកពិគ្រោះជំងឺក្រៅ ផ្នែករូបភាពវេជ្ជសាស្ត្រ និងផ្នែកឱសថស្ថាន ព្រមទាំងមានការរៀបចំបន្ទប់ផ្គត់ផ្គង់ចរន្តអគ្គិសនី បាសាំងទឹក អាងចម្រោះទឹកកខ្វក់ ប្រព័ន្ធពន្លត់អគ្គីភ័យ និងចំណតរថយន្ត ។

មានមតិស្វាគមន៍ក្នុងឱកាសនោះ ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង បានចាត់ទុកអគារថ្មីនៃមន្ទីរពេទ្យបង្អែកខេត្តដែលដាក់សម្ពោធឲ្យប្រើប្រាស់ជាផ្លូវការនៅថ្ងៃនេះ មិនត្រឹមតែជាសក្ខីភាពបង្ហាញឲ្យឃើញពីចំណងទំនាក់ទំនងមិត្តភាព និងកិច្ចសហប្រតិបត្តិការល្អប្រសើរ និងស្អិតរមួតរវាងរាជរដ្ឋាភិបាលកម្ពុជា និងរដ្ឋាភិបាលជប៉ុន ក៏ដូចជាប្រជាជនកម្ពុជា និងប្រជាជនជប៉ុនប៉ុណ្ណោះទេ ប៉ុន្ដែក៏បានបង្ហាញឲ្យឃើញពីជោគជ័យថ្មីមួយទៀតរបស់រាជរដ្ឋាភិបាលនៅក្នុងដំណើរការធ្វើទំនើបកម្មវិស័យសុខាភិបាល ដែលពិតជានឹងចូលរួមចំណែកក្នុងការជួយសម្រួលទុក្ខលំបាក ដើម្បីបំពេញបន្ថែមនូវសេវាថែទាំសុខភាពជូនប្រជាពលរដ្ឋក្នុងខេត្តស្វាយរៀង ដែលកំពុងមានតម្រូវការកើនឡើងជាលំដាប់។ ជាមួយគ្នានេះ ឯកឧត្ដមអភិបាលខេត្ត ក៏បានគោរពថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល និងក្រសួងសុខាភិបាល ដែលតែងតែយកចិត្តទុកដាក់ខ្ពស់ក្នុងការកៀរគរការចូលរួមឧបត្ថម្ភគាំទ្រទាំងថវិកា និងសម្ភារ ពីសប្បុរសជនក្នុង និងក្រៅប្រទេស ដើម្បីកសាងហេដ្ឋារចនាសម្ព័ន្ធសម្រាប់វិស័យនៅក្នុងខេត្តស្វាយរៀង សំដៅពង្រឹង និងពង្រីកសកម្មភាពផ្ដល់សេវាសុខភាពសាធារណៈជូនប្រជាពលរដ្ឋឲ្យកាន់តែប្រសើរឡើង ។ ទន្ទឹមនេះ ឯកឧត្ដមអភិបាលខេត្តក៏បានសម្ដែងនូវការអរគុណចំពោះរដ្ឋាភិបាល និងប្រជាជនជប៉ុន ដែលតែងតែជួយគាំទ្រ និងឧបត្ថម្ភដល់ដំណើរការកសាង ស្ដារឡើងវិញ និងអភិវឌ្ឍន៍ខេត្តស្វាយរៀងយើងខ្ញុំ នាពេលកន្លងមក ជាពិសេសក្នុងការជួយឧបត្ថម្ភការសាងសង់អគារមន្ទីរពេទ្យ ដោយមានបំពាក់សម្ភារបរិក្ខាពេទ្យនានាក្នុងអគារមន្ទីរពេទ្យដែលបានសាងសង់រួចនាពេលនេះ ។

មានប្រសាសន៍សំណេះសំណាលក្នុងឱកាសនោះ ឯកឧត្ដម ម៉ម ប៊ុនហេង រដ្ឋមន្ត្រីក្រសួងសុខាភិបាល បានពាំនាំនូវការផ្ដាំផ្ញើសួរសុខទុក្ខបងប្អូនប្រជាពលរដ្ឋ និងមន្ត្រីរាជការទាំងអស់ពីសំណាក់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចគតិព្រឹទ្ធបណ្ឌិត ព្រមទាំងបានលើកឡើងពីសារៈសំខាន់នៃអគារមន្ទីរពេទ្យដែលទើបសាងសង់រួច និងស្ថានភាពនៃការអភិវឌ្ឍប្រទេសជាតិ ព្រមទាំងវឌ្ឍនភាពដ៏ល្អប្រសើររបស់វិស័យសុខាភិបាលដែលចេះតែមានការអភិវឌ្ឍរីកចម្រើនឈានឡើងជាលំដាប់គួរជាទីមោទនៈ ក្រោមការដឹកនាំដ៏ត្រឹមត្រូវប្រកបដោយភាពឈ្លាសវៃរបស់សម្ដេចតេជោនាយករដ្ឋមន្ត្រី ។ ក្នុងឱកាសនោះផងដែរ ឯកឧត្ដមរដ្ឋមន្ត្រី ក៏បានចែកជូននូវអំណោយដ៏ថ្លៃថ្លារបស់សម្ដេចតេជោនាយករដ្ឋមន្ត្រី និងសម្ដេចគតិព្រឹទ្ធបណ្ឌិត ប្រគេនព្រះសង្ឃ ៧អង្គ ក្នុង ១អង្គ ទទួលបានទេយ្យវត្ថុ ១ និងបច្ច័យ ៥០០.០០០រៀល ជូនយាយជី តាជី ២០០នាក់ ម្នាក់ៗទទួលបាន ក្រណាត់ស ១ដុំ និងថវិកា ២០.០០០រៀល ជូនយុវជនកាយរឹទ្ធិ និងយុវជនកាកបាទក្រហម ២០០នាក់ ម្នាក់ៗ ថវិកា ២០.០០០រៀល ជូនលោកគ្រូ អ្នកគ្រូ ៥៧១នាក់ ម្នាក់ៗ ថវិកា ៥០.០០០រៀល ជូនអ្នកជំងឺកំពុងសម្រាកព្យាបាលនៅមន្ទីរពេទ្យ ១៨៥នាក់ ម្នាក់ៗ ថវិកា ៥០.០០០រៀល ជូនបុគ្គលិក និងគ្រូពេទ្យ ២៤១នាក់ ម្នាក់ៗ ថវិកា ១០០.០០០រៀល ជូនវិទ្យាល័យស្វាយរៀង (សង្កាត់ស្វាយរៀង) ថវិកា ២.០០០.០០០រៀល ជូនគរុកោសល្យ និងវិក្រឹត្យការខេត្តស្វាយរៀង ថវិកា ៣.០០០.០០០រៀល ជូនមន្ទីរពេទ្យបង្អែកខេត្តស្វាយរៀង ថវិកា ៥.០០០.០០០រៀល និងជូនសាលាក្រុងស្វាយរៀង ថវិកា ២.០០០.០០០រៀល ៕

 

 

 

ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀងបានអញ្ជើញចុះត្រួតពិនិត្យការតុបតែងអគារសាលប្រជុំធំសាលាខេត្ត

នាព្រឹកថ្ងៃទី០៩ ខែតុលា ឆ្នាំ២០១៧នេះ ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង រួមនិងឯកឧត្ដមអភិបាលរងខេត្ត លោកនាយកទីចាត់ការហិរញ្ញវត្ថុសាលាខេត្ត បានអញ្ជើញចុះត្រួតពិនិត្យការតុបតែងអគារសាលប្រជុំធំសាលាខេត្ត ដើម្បីត្រៀមរៀបចំពិធីសម្ពោធដាក់ឲ្យប្រើប្រាស់ជាផ្លូវការនាខែធ្នូ ឆ្នាំ២០១៧ខាងមុខនេះ ។

សូមបញ្ជាក់ថាអគារសាលប្រជុំធំសាលាខេត្ត បានចាប់ផ្ដើមដំណើរការសាងសង់ នៅថ្ងៃទី១៥ ខែកញ្ញា ឆ្នាំ២០១៦ និងបានបញ្ចប់ការសាងសង់កាលពីអំឡុងខែកក្កដា ឆ្នាំ២០១៧កន្លងទៅថ្មីៗនេះ មានទំហំ ១.១០៤ម៉ែត្រការ៉េ បណ្ដោយ ៤០ម៉ែត្រ ទទឹង ២៧ម៉ែត្រ កម្ពស់ ១៩,៦៥ម៉ែត្រ ស្ថិតនៅក្នុងបរិវេណសាលាខេត្តស្វាយរៀង ដែលអគារសាលប្រជុំនេះ គឺជាសមិទ្ធផលថ្មី និងជាហេដ្ឋារចនាសម្ព័ន្ធផ្នែករឹងសម្រាប់ជួយសម្រួលដល់ការរៀបចំកិច្ចប្រជុំ និងកម្មវិធីផ្លូវការនានារបស់រដ្ឋបាលខេត្ត៕

 

 

ឯកឧត្ដម ម៉ែន វិបុល អភិបាល នៃគណៈភិបាលខេត្តស្វាយរៀង បានអញ្ជើញជាអធិបតីក្នុងពិធីជួបសំណេះសំណាលជាមួយមាតាបិតា អាណាព្យាបាល និងសិស្សានុសិស្សដែលទទួលបាននិទ្ទេស A ទាំង ៥រូប ក្នុងខេត្តស្វាយរៀង នាសម័យប្រឡងសញ្ញាបត្រមធ្យមសិក្សាទុតិយភូមិ ២១ សីហា ២០០៧

នាព្រឹកថ្ងៃទី២៨ ខែកញ្ញា ឆ្នាំ២០១៧នេះ នៅសាលប្រជុំសាលាខេត្ត ឯកឧត្ដម ម៉ែន វិបុល អភិបាល នៃគណៈភិបាលខេត្តស្វាយរៀង បានអញ្ជើញជាអធិបតីក្នុងពិធីជួបសំណេះសំណាលជាមួយមាតាបិតា អាណាព្យាបាល និងសិស្សានុសិស្សដែលទទួលបាននិទ្ទេស A ទាំង ៥រូប ក្នុងខេត្តស្វាយរៀង នាសម័យប្រឡងសញ្ញាបត្រមធ្យមសិក្សាទុតិយភូមិ ២១ សីហា ២០០៧ ។

មានប្រសាសន៍សំណេះសំណាលក្នុងពិធីនេះ ឯកឧត្ដមអភិបាលខេត្ត បានសម្ដែងនូវការអបអរសាទរជាមួយមាតាបិតា អាណាព្យាបាល និងសិស្សានុសិស្សទាំង៥រូប ដែលបានខិតខំប្រឹងប្រែងសិក្សារហូតទទួលបាននិទ្ទេស A ដែលជានិទ្ទេសល្អប្រសើរបំផុត ក្នុងជីវិតសិក្សានៅថ្នាក់មធ្យមសិក្សា ដែលលទ្ធផលនេះ មិនត្រឹមតែជាមោទនភាពសម្រាប់ខ្លួនឯងផ្ទាល់ ក៏ដូចជាមាតាបិតាអាណាព្យាបាល លោកគ្រូ អ្នកគ្រូ និងសាលាប៉ុណ្ណោះទេ ប៉ុន្តែជាមោទនភាព និងមុខមាត់របស់ខេត្តស្វាយរៀងយើងទាំងមូល នៅក្នុងបរិបទដែលប្រទេសជាតិកំពុងទទួលផលពីសុខសន្តិភាព និងការអភិវឌ្ឍលើគ្រប់វិស័យ ជាពិសេសវិស័យសិក្សាធិការអប់រំ ។ ជាមួយនេះឯកឧត្ដមអភិបាលខេត្ត ក៏បានបញ្ជាក់ជូនថា យុវជននាពេលបច្ចុប្បន្ននេះ ពិតជាមានសំណាងណាស់ ដែលមានឳកាសពេញលេញ និងសម្បូរបែប ទទួលបាននូវការអប់រំសិក្សាគ្រប់ទីកន្លែង ព្រោះថាសាលារៀនត្រូវបានពង្រាយទៅកៀកជាប់នឹងរបងផ្ទះតែម្ដង ផ្ទុយស្រឡះពីជំនាន់មុន ដែលពុំមានឱកាសពេញលេញបែបនេះទេ ណាមួយសាលារៀននៅឆ្ងាយពីផ្ទះផង ណាមួយត្រូវគេចពីគ្រាប់ផ្លោងផង ដោយសារកាលនោះប្រទេសជាតិគ្មានសន្តិសុខពេញលេញដូចសព្វថ្ងៃនេះទេ ដូច្នេះតម្លៃនៃសន្តិភាពដែលរាជរដ្ឋាភិបាល ជាសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សម្រេចបានជូនជាតិមាតុភូមិ ពិតជាមានសារៈសំខាន់ណាស់ ដែលទាមទារឲ្យយុវជនជំនាន់ក្រោយត្រូវរួមគ្នាការពារ និងថែរក្សាឲ្យបានគង់វង្ស ។

ទន្ទឹមនេះ ឯកឧត្ដមអភិបាលខេត្ត ក៏បានធ្វើការផ្ដាំផ្ញើដល់សិស្សានុសិស្សទាំងអស់ ត្រូវចេះតស៊ូអំណត់ព្យាយាម ដោយយកចិត្តទុកដាក់រៀនសូត្រឲ្យបានពូកែថែមទៀត ត្រូវធ្វើអំពើណាដែលល្អ និងមានផលប្រយោជន៍ដល់សង្គម ត្រូវចៀសឲ្យឆ្ងាយពីគ្រឿងញៀន និងគ្រឿងស្រវឹងគ្រប់ប្រភេទ
ចៀសវាងឲ្យបាននូវអំពើអបាយមុខផ្សេងៗ ត្រូវបន្តប្រតិបត្តិខ្លួនជាកូនល្អ សិស្សនិស្សិតល្អ និងមិត្តភក្ដិល្អ ត្រូវអភិវឌ្ឍន៍ខ្លួនឲ្យក្លាយជាយុវជនគំរូ ដែលប្រកបដោយគុណសម្បត្តិបួនយ៉ាង គឺបញ្ញា សីលធម៌ សុជីវធម៌ និងកាយសម្បទាមាំមួន ដោយមិនត្រូវមានមោទភាពភ្លេចខ្លួន និងមិនត្រូវធ្វេសប្រហែសជាដាច់ខាត ត្រូវបន្តខិតខំដើម្បីសម្រេចនូវគោលដៅ និងគោលបំណងរបស់ខ្លួន ព្រមទាំងត្រូវចូលរួមគោរពប្រតិបត្តិច្បាប់ចរាចរណ៍ឲ្យបានខ្ជាប់ខ្ជួន ដើម្បីសុវត្ថិភាពខ្លួនឯងផង និងអ្នកដទៃផង ។

ជាចុងបញ្ចប់ ដើម្បីជាការចូលរួមអបអរសាទរ និងលើកទឹកចិត្តចំពោះការខិតខំប្រឹងប្រែងរបស់សិស្សានុសិស្សជ័យលាភីនិទ្ទេស A ទាំង៥រូប ឯកឧត្ដមអភិបាលខេត្ត បានផ្ដល់រង្វាន់លើកទឹកចិត្តសម្រាប់សិស្សានុសិស្សម្នាក់ៗទទួលបាន ៖
១.ម៉ូតូហុងដាឌ្រីម ស៊េរី ឆ្នាំ២០១៧ ចំនួន ០១គ្រឿង
២.Laptop ១គ្រឿង និង
៣.ថវិកា ១០០.០០០រៀល ៕

ឯកឧត្ដម ម៉ែន វិបុល អភិបាល នៃគណៈអភិបាលខេត្ត បានអញ្ជើញជាគណៈអធិបតីក្នុងពិធីប្រគល់គោយន្ត និងបំពាក់ឧបករណ៍ជូនដល់សហគមន៍កសិកម្ម ចំនួន ១៣ ក្នុងខេត្តស្វាយរៀង

 

ពិធីប្រគល់គោយន្ត និងបំពាក់ឧបករណ៍ជូនដល់សហគមន៍កសិកម្ម ចំនួន ១៣ ក្នុងខេត្តស្វាយរៀង

នាព្រឹកថ្ងៃទី២៧ ខែកញ្ញា ឆ្នាំ២០១៧នេះ នៅមន្ទីរកសិកម្ម រុក្ខាប្រមាញ់ និងនេសាទខេត្ត មានរៀបចំពិធីប្រគល់គោយន្ត និងបំពាក់ឧបករណ៍ជូនដល់សហគមន៍កសិកម្ម ចំនួន ១៣ ក្នុងខេត្តស្វាយរៀង ដែលជាជំនួយរបស់សាធារណរដ្ឋប្រជាមានិតចិន តាមរយៈក្រសួងកសិកម្ម រុក្ខាប្រមាញ់ និងនេសាទ ក្រោមអធិបតីភាពឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង និងឯកឧត្ដម កៅ ផល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងមានការអញ្ជើញចូលរួមពីឯកឧត្ដម ពេជ សាវ៉ាន់ អភិបាលរងខេត្ត លោក លោកស្រីប្រធាន អនុប្រធាន និងមន្ត្រីរាជការ នៃមន្ទីរកសិកម្ម រុក្ខាប្រមាញ់ និងនេសាទខេត្ត ព្រមទាំងតំណាងសហគមន៍កសិកម្មនានាដែលមាននៅក្នុងខេត្ត ។

មានប្រសាសន៍ក្នុងឱកាសនោះ ឯកឧត្ដមអភិបាលខេត្ត បានថ្លែងអំណរគុណដល់ក្រសួងកសិកម្ម រុក្ខាប្រមាញ់ និងនេសាទ ដែលតែងតែជួយសហការ និងគាំទ្រដល់ការអភិវឌ្ឍវិស័យកសិកម្មក្នុងខេត្តស្វាយរៀង នាពេលកន្លងមក ហើយដែលថ្ងៃនេះទៀត បានផ្ដល់នូវអំណោយដ៏មានសារៈសំខាន់ជាគោយន្ត ចំនួន ១៣គ្រឿង ដល់សហគមន៍កសិកម្មទាំង ១៣ ក្នុងខេត្ត សម្រាប់យកទៅប្រើប្រាស់បម្រើឲ្យការងារផលិតកម្ម និងអាជីវកម្ម ដែលជាប្រយោជន៍រួមរបស់សហគមន៍ទាំងមូល ។ ជាមួយនេះ ឯកឧត្ដមអភិបាលខេត្ត ក៏បានលើកឡើងអំពីការអភិវឌ្ឍរីកចម្រើននៃវិស័យកសិកម្មក្នុងខេត្តនារយៈពេលប៉ុន្មានឆ្នាំចុងក្រោយនេះ ទាំងលើការបង្កបង្កើនផលស្រូវ ការដាំដំណាំកសិ-ឧស្សាហកម្ម ការចិញ្ចឹមសត្វ និងការដាំបន្លែជាលក្ខណៈគ្រួសារ ជាពិសេសការដាំដុះបន្លែសរីរាង្គ ជាលក្ខណៈសហគមន៍កសិកម្ម ដោយបាននាំយកទៅលក់នៅតាមផ្សារទំនើបនានានៅរាជធានីភ្នំពេញ ដែលលទ្ធផលទាំងអស់នេះ គឺកើតចេញពីការចូលរួមចំណែកយ៉ាងសកម្មពីមន្ទីរកសិកម្ម រុក្ខាប្រមាញ់ និងនេសាទ អង្គការសង្គមស៊ីវិល អង្គភាពពាក់ព័ន្ធ និងការខិតខំប្រឹងប្រែងរបស់សហគមន៍កសិកម្មទាំងអស់ដែលមាននៅក្នុងខេត្ត ។

ទនឹ្ទមនេះ ឯកឧត្ដមអភិបាលខេត្ត ក៏បានផ្ដាំផ្ញើដល់សហគមន៍ទាំងអស់ត្រូវខិតខំប្រើប្រាស់ និងទាញផលពីឧបករណ៍ដែលទទួលបាននៅថ្ងៃនេះឲ្យអស់លទ្ធភាព និងប្រសិទ្ធភាពសេដ្ឋកិច្ច យកទៅប្រើប្រាស់សម្រាប់បម្រើឲ្យផលប្រយោជន៍រួម និងពិតប្រាកដរបស់សហគមន៍ ធានាការប្រើប្រាស់ឲ្យបានគង់វង្សយូរអង្វែង និងត្រូវសំអាត ទុកដាក់ រក្សាទុកឲ្យបានត្រឹមត្រូវនៅក្រោយពេលប្រើប្រាស់រួច ៕
#ខេត្តស្វាយរៀង#មន្ទីរកសិកម្ម រុក្ខាប្រមាញ់ និងនេសាទ#

 

អត្ថបទ​ផ្សេងៗ​ទៀត...

  1. ឯកឧត្ដមបណ្ឌិត គឹម ធា ប្រធានក្រុមប្រឹក្សាខេត្ត និងឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង បានអញ្ជើញចូលរួមក្នុងពិធីសម្ពោធអគារពុទ្ធិកបឋមសិក្សា និងសមិទ្ធផលនានាក្នុងវត្តចន្រ្តី ស្ថិតនៅភូមិចន្ត្រី ឃុំចន្រ្តី ស្រុកមាសហែក ខេត្តស្វាយរៀង
  2. ឯកឧត្ដមបណ្ឌិត គឹម ធា ប្រធានក្រុមប្រឹក្សាខេត្ត និងឯកឧត្ដម ម៉ែន វិបុល អភិបាល នៃគណៈអភិបាលស្វាយរៀង បានអញ្ជើញចូលរួមក្នុងពិធីប្រកាសចូលកាន់តំណែងប្រធានមន្ទីរអប់រំ យុវជន និងកីឡាខេត្តស្វាយរៀង
  3. ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង និងឯកឧត្ដមបណ្ឌិត គឹម ធា ប្រធានក្រុមប្រឹក្សាខេត្ត បានអញ្ជើញជាគណៈអធិបតីក្នុងពិធីក្រុងពាលី និងបញ្ចុះបឋមសិលាសាងសង់អគារធ្វើការ នៃទីចាត់ការអន្តរវិស័យ ទីចាត់ការគ្រប់គ្រងធនធានមនុស្ស និងអង្គភាពលទ្ធកម្មរដ្ឋបាលខេត្ត
  4. ឯកឧត្ដម ម៉ែន វិបុល អភិបាល នៃគណៈអភិបាលខេត្ត បានអញ្ជើញជាអធិបតីក្នុងពិធីប្រារព្ធទិវាមច្ឆជាតិ ០១ កក្កដា ២០១៧ នៅបរិវេណវត្តក្ដីរំដួល ភូមិអកនាគ សង្កាត់សង្ឃ័រ ក្រុងស្វាយរៀង

ព័ត៌មានថ្មីៗ

យុទ្ធសាស្ត្រចតុកោណ(ដ៣)

ចំនួនអ្នកទស្សនា

ថ្ងៃនេះ 3

ម្សិលមិញ 7

សប្តាហ៍ 37

ខែ 195

សរុប 5166