ប្រព័ន្ធស្ថិតិអត្រានុកូលដ្ឋាន

បណ្ណាល័យ គ.ជ.អ.ប

សិក្ខាសាលាសមាហរណកម្មផែនការឃុំ សង្កាត់នៅថ្នាក់ក្រុង ស្រុក ឆ្នាំ២០១៧ នៅក្រុងបាវិត និងស្រុកកំពង់រោទិ៍

នាព្រឹកថ្ងៃពុធ ៣កើត ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២០ ខែធ្នូ ឆ្នាំ២០១៧នេះ នៅក្រុងបាវិត និងស្រុកកំពង់រោទិ៍ ខេត្តស្វាយរៀង មានរៀបចំសិក្ខាសាលាសមាហរណកម្មផែនការឃុំ សង្កាត់នៅថ្នាក់ក្រុង ស្រុក ឆ្នាំ២០១៧ ដែលស្រុកកំពង់រោទិ៍ប្រព្រឹត្តទៅក្រោមអធិបតីភាពឯកឧត្ដម ពេជ សាវ៉ាន់ អភិបាលរង នៃគណៈអភិបាលខេត្ត និងនៅក្រុងបាវិត ប្រព្រឹត្តទៅក្រោមអធិបតីភាពឯកឧត្ដម ហែម ពិសិដ្ឋ អភិបាលរង នៃគណៈអភិបាលខេត្តស្វាយរៀង និងមានការអញ្ជើញចូលរួមពីលោកនាយករងរដ្ឋបាលសាលាខេត្ត លោក លោកស្រីប្រធាន អនុប្រធានមន្ទីរ-អង្គភាពនានាក្នុងខេត្ត ក្រុមប្រឹក្សាក្រុង ក្រុមប្រឹក្សាស្រុក គណៈអភិបាលក្រុង គណៈអភិបាលស្រុក តំណាងកងកម្លាំងទាំងបី ការិយាល័យនានាជុំវិញក្រុង ស្រុក លោក លោកស្រីមេឃុំ ចៅសង្កាត់ ស្មៀនឃុំ សង្កាត់ និងមន្ត្រីពាក់ព័ន្ធជាច្រើនរូបទៀត ។

សិក្ខាសាលាសមាហរណកម្មផែនការឃុំ សង្កាត់នៅថ្នាក់ក្រុង ស្រុកនេះ ត្រូវបានប្រារព្ធធ្វើជារៀងរាល់ឆ្នាំ ក្នុងគោលបំណង ដើម្បីឲ្យគម្រោងសកម្មភាពជាអាទិភាពស្នើឡើងដោយឃុំ សង្កាត់ មានភាពស៊ីសង្វាក់ប្រទាក់ក្រឡាគ្នាទៅនឹងគោលនយោបាយយុទ្ធសាស្ត្រ និងសកម្មភាពនានារបស់បណ្ដាមន្ទីរ-អង្គភាពជំនាញ និងអង្គការមិនមែនរដ្ឋាភិបាល ឈានទៅសម្រេចបាននូវគោលដៅរួមនៃការអភិវឌ្ឍមូលដ្ឋានប្រកបដោយប្រសិទ្ធភាព និងស័ក្ដិសិទ្ធិភាព ឆ្លើយតបទៅនឹងតម្រូវការជាក់ស្ដែងពិតប្រាកដរបស់ប្រជាពលរដ្ឋ ។

ដំណើរការសិក្ខាសាលានេះ ប្រព្រឹត្តទៅដោយមានការចុះកិច្ចសន្យាគាំទ្រគម្រោងរវាងមន្ទីរជំនាញ និងអង្គការនានា ជាមួយនឹងអង្គភាពអនុវត្តនៅថ្នាក់ក្រុង ស្រុក ក្នុងនោះនៅក្រុងបាវិត មានគម្រោងគាំទ្រសរុប ចំនួន ១១៨ គម្រោង (ក្នុងគម្រោង ៥៤គម្រោង និង ក្រៅគម្រោងចំនួន ៦៤គម្រោង) និងនៅស្រុកកំពង់រោទិ៍ មានគម្រោងគាំទ្រសរុប ៣៥០គម្រោង (ក្នុងគម្រោង ៥៤គម្រោង និង ក្រៅគម្រោងចំនួន ២៩៦គម្រោង) ៕

ពិធីសំណេះសំណាលជាមួយពលទាហានស្ម័គ្រចិត្តបំពេញក្របខ័ណ្ឌកងពលតូចអន្តរាគមន៍លេខ១២៨ យោធភូមិភាគទី១

នាព្រឹកថ្ងៃពុធ ០៣កើត ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២០ ខែធ្នូ ឆ្នាំ២០១៧នេះ ឯកឧត្ដម ម៉ែន វិបុល អភិបាល នៃគណៈអភិបាលខេត្ត និងជាប្រធានក្រុមការងារជ្រើសរើសពលទាហានបំពេញក្របខ័ណ្ឌឲ្យយោធភូមិភាគទី១កងទ័ពជើងគោក ខេត្តស្វាយរៀង បានអញ្ជើញជាអធិបតីក្នុងពិធីសំណេះសំណាលជាមួយពលទាហានស្ម័គ្រចិត្តបំពេញក្របខ័ណ្ឌកងពលតូចអន្តរាគមន៍លេខ១២៨ យោធភូមិភាគទី១ ដែលប្រារព្ធធ្វើនៅទីបញ្ជាការដ្ឋានតំបន់ប្រតិបត្តិការសឹករងស្វាយរៀង ។ អញ្ជើញចូលរួមក្នុងពិធីនេះ រួមមានឯកឧត្ដមអភិបាលរងខេត្ត លោកមេបញ្ជាការ មេបញ្ជាការរងតំបន់ប្រតិបត្តិការសឹករងស្វាយរៀង លោកមេបញ្ជាការរងកងរាជអាវុធហត្ថខេត្ត លោកស្នងការរងនគរបាលខេត្ត លោក លោកស្រីប្រធាន អនុប្រធានមន្ទីរ-អង្គភាពនានាក្នុងខេត្ត នាយទាហាន នាយទាហានរង ព្រមទាំងពលទាហានស្ម័គ្រចិត្តដែលទើបជ្រើសរើសថ្មី ទាំង ១១៥រូប ។

មានប្រសាសន៍សំណេះសំណាលនៅក្នុងពិធីនេះ ឯកឧត្ដមអភិបាលខេត្ត បានចូលរួមអបអរសាទរជាមួយនឹងលទ្ធផលដ៏ប្រសើរដែលពលទាហានស្ម័គ្រចិត្ត ទាំង ១១៥រូប ទទួលបាននៅពេលនេះ ដែលមិនត្រឹមតែជាមោទភាពសម្រាប់ខ្លួនឯងប៉ុណ្ណោះទេ ប៉ុន្តែក៏ជាមោទនភាពរបស់ក្រុមគ្រួសារ និងឳពុកម្ដាយរបស់ពលទាហានស័្មគ្រចិត្តទាំងអស់ផងដែរ ព្រមទាំងបានថ្លែងនូវការកោតសរសើរ និងថ្លែងនូវការអរគុណចំពោះបញ្ជាការដ្ឋានតំបន់ប្រតិបត្តិការសឹករងស្វាយរៀង និងបញ្ជាការដ្ឋានកងរាជអាវុធហត្ថខេត្ត ក្នុងនាមជាសេនាធិការឲ្យក្រុមការងារជ្រើសរើសពលទាហានបំពេញក្របខ័ណ្ឌឲ្យយោធភូមិភាគទី១កងទ័ពជើងគោក ខេត្តស្វាយរៀង ដែលបានអនុវត្តតួនាទីភារកិច្ចរបស់ខ្លួនយ៉ាងយកចិត្តទុកដាក់ និងសកម្មបំផុត ដោយបានចុះធ្វើការផ្សព្វផ្សាយ និងចែកពាក្យស្នើសុំ ដល់គ្រប់មូលដ្ឋាននៅទូទាំងខេត្ត នាំឲ្យសម្រេចបាននូវផែនការជ្រើសរើសយុវជនស្ម័គ្រចិត្តប្រកបដោយសក្ដានុពលទាំង ១១៥រូប ចូលបម្រើក្នុងជួរកងយោធពលខេមរភូមិន្ទ បានប្រកបដោយជោគជ័យទៅតាមសន្ទស្សន៍ ដែលគណៈកម្មការជ្រើសរើសទ័ពរបស់អគ្គបញ្ជាការបានកំណត់ ។ ទន្ទឹមនេះ ឯកឧត្ដមអភិបាលខេត្តក៏បានបញ្ជាក់បន្ថែមថា ជាភ័ព្វសំណាងណាស់ដែលនាយទាហាន និងពលទាហានយើងនាពេលបច្ចុប្បន្នចូលបម្រើក្នុងជួរកងទ័ព ចំពេលដែលប្រទេសជាតិមានសុខសន្តិភាពពេញលេញ ដូច្នេះក្រៅពីមានកាតព្វកិច្ចក្នុងការការពារបូរណភាពទឹកដី ការពារព្រះមហាក្សត្រ ការពាររដ្ឋធម្មនុញ្ញ ការពាររាជរដ្ឋាភិបាលស្របច្បាប់ គឺមានភារកិច្ចដ៏ធំមួយទៀតគឺការពារ និងថែរក្សាឲ្យបានគង់វង្សនូវសុខសន្តិភាពដែលយុទ្ធជនជំនាន់មុនក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាជាប្រមុខ បានតស៊ូ លះបង់ទាំងកម្លាំងកាយ និងកម្លាំងចិត្ត កសាងបានទាំងលំបាកសម្រាប់ប្រជាជន និងប្រទេសជាតិ ។

ក្នុងឱកាសនេះផងដែរ ឯកឧត្ដមអភិបាលខេត្ត ក៏បានធ្វើការផ្ដាំផ្ញើដល់ពលទាហានស័្មគ្រចិត្តទាំងអស់ដែលនឹងត្រូវបញ្ជូនទៅសាលាហ្វឹកហ្វឺននាពេលខាងមុខ ត្រូវយកចិត្តទុកដាក់ខិតខំរៀនសូត្រ រក្សាឲ្យបាននូវសាមគ្គីភាព មិនត្រូវសេពគ្រឿងស្រវឹងនៅពេលហ្វឹកហាត់ និងក្នុងម៉ោងរៀនសូត្រ ត្រូវចេះថែរក្សាសុខភាពឲ្យបានល្អ និងត្រូវគោរពឲ្យបានម៉ឺងម៉ាត់នូវវិន័យ និងបទបញ្ជាផ្ទៃក្នុង ក្នុងវគ្គ និងពេលវេលារៀនសូត្រ ។ ជាចុងបញ្ចប់ឯកឧត្ដមអភិបាលបានឧបត្ថម្ភដល់ពលទាហានស័្មគ្រចិត្តទាំង ១១៥នាក់ ក្នុង ១នាក់ ទទួលបានថវិកា ៥ម៉ឺនរៀល ៕

សិក្ខាសាលាសមាហរណកម្មផែនការឃុំ នៅថ្នាក់ ស្រុក ឆ្នាំ២០១៧ នៅសាលាស្រុករំដួល

នៅថ្ងៃអង្គារ ២កើត ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១៩ ខែធ្នូ ឆ្នាំ២០១៧នេះ ឯកឧត្ដម តូច ប៉ូលីវ៉ា អភិបាលរង នៃគណៈអភិបាលខេត្តស្វាយរៀង បានអញ្ជើញជាអធិបតីក្នុងសិក្ខាសាលាសមាហរណកម្មផែនការឃុំ នៅថ្នាក់ ស្រុក ឆ្នាំ២០១៧ នៅសាលាស្រុករំដួល ខេត្តស្វាយរៀង ដោយមានការអញ្ជើញចូលរួមពីលោកស្រីនាយករងរដ្ឋបាលសាលាខេត្ត លោក លោកស្រីប្រធាន អនុប្រធានមន្ទីរ-អង្គភាពនានាក្នុងខេត្ត ក្រុមប្រឹក្សាស្រុក គណៈអភិបាលស្រុក ការិយាល័យនានាជុំវិញស្រុក លោកមេឃុំ ស្មៀនឃុំ និងមន្ត្រីពាក់ព័ន្ធសរុប ៨៧នាក់ ស្រី ២០នាក់ ៕

ការជួបពិភាក្សាការងារជាមួយគណៈប្រតិភូអគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ

នារសៀលថ្ងៃអង្គារ ២កើត ខែបុស្ស ឆ្នាំរកា នព្វស័ក ព ស ២៥៦១ ត្រូវនឹងថ្ងៃទី១៩ខែធ្នូ ឆ្នាំ២០១៧នេះ នៅសាលាខេត្តស្វាយរៀង ឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង បានទទួលជួបពិភាក្សាការងារជាមួយគណៈប្រតិភូអគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ ដែលដឹកនាំដោយ ឯកឧត្តមឧត្តមសេនីយ៍ឯក គង់ ចន្ធី អគ្គនាយករង នៃអគ្គនាយកដ្ឋានភស្តុភារនិងហិរញ្ញវត្ថុក្រសួងមហាផ្ទៃ ។

កិច្ចពិភាក្សានេះ បានផ្តោតសំខាន់ជុំវិញការទំនាក់ទំនងផ្តល់ព័ត៌មានសម្រាប់ការផ្សព្វផ្សាយតាមប្រព័ន្ធបច្ចេកវិទ្យាឥតខ្សែបែបឌីជីថលទំនើប ឬទូរសព្ទចល័ត និងតាមប្រព័ន្ធផ្កាយរណបស្តង់ដារអន្តរជាតិជូនស្ថានីយ៍វិទ្យុ និងទូរទស្សន៍ក្រសួងមហាផ្ទៃ ឈ្មោះថា Nice TV ៕

 

ព័ត៌មានថ្មីៗ

យុទ្ធសាស្ត្រចតុកោណ(ដ៣)

ចំនួនអ្នកទស្សនា

ថ្ងៃនេះ 0

ម្សិលមិញ 4

សប្តាហ៍ 4

ខែ 141

សរុប 6872