ប្រព័ន្ធស្ថិតិអត្រានុកូលដ្ឋាន

បណ្ណាល័យ គ.ជ.អ.ប

សិក្ខាសាលាសមាហរណកម្មផែនការសង្កាត់នៅថ្នាក់ក្រុង ឆ្នាំ២០១៧

នាព្រឹកថ្ងៃអង្គារ ២កើត ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១៩ ខែធ្នូ ឆ្នាំ២០១៧នេះ នៅក្រុងស្វាយរៀង ខេត្តស្វាយរៀង មានរៀបចំសិក្ខាសាលាសមាហរណកម្មផែនការសង្កាត់នៅថ្នាក់ក្រុង ឆ្នាំ២០១៧ ក្រោមអធិបតីភាពឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង និងមានការអញ្ជើញចូលរួមពីលោកនាយករដ្ឋបាលសាលាខេត្ត លោក លោកស្រីប្រធាន អនុប្រធានមន្ទីរ-អង្គភាពនានាក្នុងខេត្ត ក្រុមប្រឹក្សាក្រុង គណៈអភិបាលក្រុង ការិយាល័យនានាជុំវិញក្រុង លោក លោកស្រីចៅសង្កាត់ ស្មៀនសង្កាត់ និងមន្ត្រីពាក់ព័ន្ធ សរុប ៦៧នាក់ ស្រី ១៨នាក់ ។

មានប្រសាសន៍ក្នុងឱកាសនោះ ឯកឧត្ដមអភិបាលខេត្ត បានថ្លែងនូវការកោតសរសើរចំពោះអាជ្ញាធរក្រុង សង្កាត់ ដែលកន្លងមកបានខិតខំអនុវត្តការងារអភិវឌ្ឍន៍មូលដ្ឋាន និងផ្ដល់សេវាសាធារណៈជូនប្រជាពលរដ្ឋបានល្អប្រសើរនាពេលកន្លងមក ស្របតាមផែនការអភិវឌ្ឍន៍ និងកម្មវិធីវិនិយោគរបស់ខ្លួន ។ ជាមួយនេះ ឯកឧត្ដមអភិបាលខេត្ត ក៏បានសម្ដែងនូវការអរគុណចំពោះមន្ទីរ-អង្គភាពពាក់ព័ន្ធ អង្គការជាតិ-អន្តរជាតិ និងសប្បុរសទាំងអស់ ដែលបានសហការគាំទ្រដល់ដំណើរអភិវឌ្ឍន៍ និងការកសាងផែនការអភិវឌ្ឍន៍ និងកម្មវិធីវិនិយោគរបស់សង្កាត់តាំងពីដំណាក់កាលដំបូងរហូតដល់ដំណាក់កាលនៃការធ្វើសមាហរណកម្មនេះ ព្រមទាំងបានបញ្ជាក់ពីគោលបំណងនៃការរៀបចំសិក្ខាសាលានាពេលនេះ គឺដើម្បីឲ្យគម្រោងសកម្មភាពជាអាទិភាពស្នើឡើងដោយសង្កាត់ មានភាពស៊ីសង្វាក់ប្រទាក់ក្រឡាគ្នាទៅនឹងគោលនយោបាយយុទ្ធសាស្ត្រ និងសកម្មភាពនានារបស់បណ្ដាមន្ទីរ-អង្គភាពជំនាញ និងអង្គការមិនមែនរដ្ឋាភិបាល ឈានទៅសម្រេចបាននូវគោលដៅរួមនៃការអភិវឌ្ឍមូលដ្ឋានប្រកបដោយប្រសិទ្ធភាព និងស័ក្ដិសិទ្ធិភាព ឆ្លើយតបទៅនឹងតម្រូវការជាក់ស្ដែងពិតប្រាកដរបស់ប្រជាពលរដ្ឋ ។

ជាចុងបញ្ចប់ ឯកឧត្ដមអភិបាលខេត្ត បានសំណូមពរដល់អង្គសិក្ខាសាលាទាំងមូល ត្រូវរួមគ្នាពិនិត្យមើលពីមូលហេតុដែលគម្រោងនានានៅឆ្នាំចាស់បានលើកឡើងហើយ ប៉ុន្តែមិនអាចអនុវត្តបាន ផ្ដល់ការគាំទ្រលើផែនការនៅក្នុងគម្រោងឲ្យបានច្រើន ចៀសវាងគម្រោងជាន់គ្នារវាងសង្កាត់ និងមន្ទីរជំនាញដែលជាអង្គភាពគាំទ្រ ។

សូមបញ្ជាក់ថានៅថ្ងៃដដែលនេះ នៅស្រុកស្វាយជ្រំ និងស្រុករំដួល ក៏មានរៀបចំសិក្ខាសាលាសមាហរណកម្មផែនការឃុំនៅថ្នាក់ស្រុក ឆ្នាំ២០១៧ផងដែរ ដែលប្រព្រឹត្តទៅក្រោមអធិបតីភាពលោកជំទាវ ពៅ សុភាព និងឯកឧត្ដម តូច ប៉ូលីវ៉ា អភិបាលរង នៃគណៈអភិបាលខេត្តស្វាយរៀង ៕

ពិធីបញ្ចុះបឋមសិលាសាងសង់អគារមណ្ឌលសុខភាព០១ខ្នង ស្ថិតនៅឃុំគគី ស្រុករមាសហែក ខេត្តស្វាយរៀង

នៅថ្ងៃចន្ទ ១កើត ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១៨ ខែធ្នូ ឆ្នាំ២០១៧នេះ ឯកឧត្ដមបណ្ឌិត គឹម ធា ប្រធានក្រុមប្រឹក្សាខេត្ត និងឯកឧត្ដម តូច ប៉ូលីវ៉ា អភិបាលរង នៃគណៈអភិបាលខេត្តស្វាយរៀង បានអញ្ជើញចូលរួមក្នុងពិធីបញ្ចុះបឋមសិលាសាងសង់អគារមណ្ឌលសុខភាព០១ខ្នង ស្ថិតនៅឃុំគគី ស្រុករមាសហែក ខេត្តស្វាយរៀង ក្រោមអធិបតីភាពលោកជំទាវបណ្ឌិត ម៉ែន សំអន ឧបនាយករដ្ឋមន្រ្ដី រដ្ឋមន្រ្ដីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងជាប្រធានក្រុមការងារថ្នាក់ជាតិចុះមូលដ្ឋាននៅខេត្តស្វាយរៀង ។

ក្នុងពិធីនេះ ក៏មានអញ្ជើញចូលរួមពីលោកជំទាវតំណាងរាស្ត្រមណ្ឌលខេត្តស្វាយរៀង ឯកឧត្ដម លោកជំទាវ លោក លោកស្រី ប្រធាន អនុប្រធាន និងសមាជិកក្រុមការងារថ្នាក់ជាតិចុះមូលដ្ឋានក្រុង ស្រុក នៃខេត្តស្វាយរៀង តំណាងក្រសួងសុខាភិបាល តំណាងអាជ្ញាធរជាតិអាវុធគីមី កងកម្លាំងទាំងបី ប្រធានមន្ទីរ-អង្គភាពនានាក្នុងខេត្ត អាជ្ញាធរមូលដ្ឋាន និងបងប្អូនប្រជាពលរដ្ឋប្រមាណជាង ៤០០នាក់ ។

ថ្លែងក្នុងឱកាសនោះ លោកជំទាវឧបនាយករដ្ឋមន្ត្រី បានសម្តែងនូវការកោតសសើរចំពោះរដ្ឋមន្ត្រីក្រសួងសុខាភិបាល រដ្ឋបាលខេត្តស្វាយរៀង រដ្ឋបាលស្រុករមាសហែក លោក លោកស្រី ដែលបានខិតខំរួមគ្នាជាមួយមជ្ឈមណ្ឌលកម្ចាត់មីនកម្ពុជា (ស៊ីម៉ាក់) ជាពិសេសក្រុមការងារប្រតិបត្តិការបោសសម្អាតគ្រាប់បែកគីមី អាជ្ញាធរជាតិអាវុធគីមី បានរកឃើញ និងវាយតម្លៃយកគ្រាប់បែកគីមីចំនួនមួយគ្រាប់ក្នុងបរិវេណវត្តគគីរ ហើយបានជួយសម្រួលក្នុងការជម្លៀសពលរដ្ឋពីកន្លែងបោសសំអាតគ្រាប់បែកគីមី មកកាន់ទីកន្លែងមានសុវត្ថិភាព និងបានពិនិត្យ ព្យាបាលហើយសិក្សាស្រាវជ្រាវ និងវាយតម្លៃផលប៉ះពាល់សុខភាពដល់ប្រជាពលរដ្ឋ។ ចំណែកឯក្រសួងសុខាភិបាលវិញ ក៏បានយកចិត្តទុកដាក់ក្នុងការពិនិត្យសុខភាព ជូនបងប្អូន និងបានចុះសិក្សាស្រាវជ្រាវជាបន្តបន្ទាប់ បានរកឃើញអ្នកជំងឺរងផលប៉ះពាល់ ដោយសារធាតុគីមីនៅក្នុងឃុំគគីរនេះ រោគសញ្ញាទាំងនោះមាន៖ រោគសញ្ញាមិនធម្មតាក្បាលធំ ស្វិតដៃ ស្វិតជើង ថប់ដង្ហើម អាឡាក់ស៊ីស្បែក និងរមាសជាដើម។

ជាមួយនេះ លោកជំទាវបានបន្តទៀតថា ការកសាងមណ្ឌលសុខភាពនេះឡើង បើទោះបីជាចំនួនប្រជាពលរដ្ឋនៅឃុំគគីរ ពុំទាន់សមាមាត្រសមស្របនឹងបង្កើតមណ្ឌលសុខភាពយ៉ាងណាក្តី ប៉ុន្តែដោយការគិតគូរខ្វល់ខ្វាយយ៉ាងខ្លាំងរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ចំពោះសុខភាពប្រជាពលរដ្ឋដែលបានរងផលប៉ះពាល់ដោយសារគ្រាប់បែកគីមីរបស់អាមេរិកដែលបានទម្លាក់នៅចន្លោះឆ្នាំ១៩៧០-១៩៧៥ ដើម្បីពិនិត្យ ព្យាបាល និងថែទាំសុខភាពជូនបងប្អូនប្រជាពលរដ្ឋនៅក្នុងតំបន់នោះ ៕

កិច្ចប្រជុំផ្សព្វផ្សាយការចុះអនុវត្តអនុក្រឹត្យលេខ១២៩ អនក្រ.បក ស្តីពីការលុបចោល និងដកហូតឯកសាររដ្ឋបាលកម្ពុជាមិនប្រក្រតីដែលជនបរទេសកំពុងកាន់កាប់ប្រើប្រាស់

នាព្រឹកថ្ងៃចន្ទ ១កើត ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១៨ ខែធ្នូ ឆ្នាំ២០១៧នេះ នៅខេត្តស្វាយរៀងមានរៀបចំកិច្ចប្រជុំផ្សព្វផ្សាយការចុះអនុវត្តអនុក្រឹត្យលេខ១២៩ អនក្រ.បក ស្តីពីការលុបចោល និងដកហូតឯកសាររដ្ឋបាលកម្ពុជាមិនប្រក្រតីដែលជនបរទេសកំពុងកាន់កាប់ប្រើប្រាស់ ក្រោមអធិបតីភាពឯកឧត្ដម ហ៊ូ វតនៈ អភិបាលរង នៃគណៈអភិបាលខេត្តស្វាយរៀង តំណាងឯកឧត្ដម ម៉ែន វិបុល អភិបាល នៃគណៈអភិបាលខេត្ត ឯកឧត្ដមឧត្ដមសេនីយ៍ឯក សុវណ្ណា ពិសាខា និងឯកឧត្ដមឧត្ដមសេនីយ៍ឯក ជា ធា អគ្គនាយករង នៃអគ្គនាយកដ្ឋានអន្តោប្រវេសន៍ និងមានការអញ្ជើញចូលរួមពីគណៈប្រតិភូអគ្គនាយកដ្ឋានអន្តោប្រវេសន៍ លោកប្រធានសាលាដំបូងខេត្ត លោកព្រះរាជអាជ្ញារងខេត្ត លោកឧត្ដមសេនីយ៍ស្នងការ ស្នងការរងនគរបាលខេត្ត លោកមេបញ្ជាការរងកងរាជអាវុធហត្ថខេត្ត លោកអភិបាលក្រុង/ស្រុកទាំង៨ លោកមេបញ្ជាការវរសេនាតូចនគរបាលការពារព្រំដែនទាំងពីរ លោក លោកស្រី នាយ នាយរងការិយាល័យចំណុះស្នងការដ្ឋាននគរបាលខេត្ត នាយ នាយរងផ្នែក និងមន្ត្រីចំណុះផែនអន្តោប្រសេន៍ លោកអធិការ អធិការរង នាយ នាយរងផ្នែកទទួលការងារអន្តោប្រវេសន៍ក្រុង/ស្រុកទាំង៨ លោក លោកស្រីមេឃុំ/ចៅសង្កាត់ និងនាយប៉ុស្តិ៍នគរបាលរដ្ឋបាលទាំង ៨០ សរុបវត្តមាន ២៣៩ នាក់ ។

នៅក្នុងកិច្ចប្រជុំផ្សព្វផ្សាយនេះ ក្រៅពីផ្សព្វផ្សាយខ្លឹមសារអនុក្រឹត្យលេខ១២៩ អនក្រ ស្តីពីការលុបចោល និងដកហូតឯកសាររដ្ឋបាលកម្ពុជាមិនប្រក្រតីដែលជនបរទេសកំពុងកាន់កាប់ប្រើប្រាស់ ក៏មានការធ្វើបទបង្ហាញពីប្រកាសស្ដីពីបែបបទ នីតិវិធី ការពិនិត្យ ការចុះបញ្ជីទទួលស្គាល់ជនបរទេសអន្តោប្រវេសន្ដក្នុងព្រះរាជាណាចក្រកម្ពុជា និងប្រកាសស្ដីពីបែបបទ និងនីតិវិធីនៃការដកហូតឯកសាររដ្ឋបាលកម្ពុជាមិនប្រក្រតីដែលជនបរទេសកំពុងកាន់កាប់ប្រើប្រាស់នៅខេត្តស្វាយរៀង ដែលរួមមាន៖ សៀវភៅស្នាក់នៅ សៀវភៅគ្រួសារ សំបុត្រកំណើតខែ្មរ សំបុត្រអាពាហ៍ពិពាហ៍ អត្តសញ្ញាណប័ណ្ណសញ្ជាតិខែ្មរ និងលិខិតឆ្លងដែន ។

មានប្រសាសន៍ក្នុងឱកាសនោះ ឯកឧត្ដម ហ៊ូ វតនៈ អភិបាលរង នៃគណៈអភិបាលខេត្តស្វាយរៀង បានសម្ដែងនូវការអរគុណចំពោះគណៈប្រតិភូអគ្គនាយកដ្ឋានអន្តោប្រវេសន៍ ដែលបានអញ្ជើញចុះមកធ្វើការផ្សព្វផ្សាយការចុះអនុវត្តអនុក្រឹត្យស្ដីពីការលុបចោល និងការដកហូតឯកសាររដ្ឋបាលកម្ពុជាមិនប្រក្រតី ដែលជនបរទេសកំពុងកាន់កាប់ប្រើប្រាស់នៅខេត្តស្វាយរៀង ដោយបានធ្វើបទបង្ហាញ និងបកស្រាយយ៉ាងក្បោះក្បាយ និងពិស្ដារនូវបែបបទនីតិវិធី នៃការដកហូត ការដាក់ពាក្យសុំប្រកាសទទួលស្គាល់ និងការដាក់ពាក្យសុំប័ណ្ណស្នាក់នៅអចិន្ត្រៃយ៍ ជូនដល់អង្គប្រជុំ ក៏ដូចជាមន្ត្រីអនុវត្ត ដែលបទបង្ហាញនេះ គឺជាមូលដ្ឋានគ្រឹះដ៏មានសារៈសំខាន់សម្រាប់ជួយគាំទ្រដល់មន្ត្រីមានសមត្ថកិច្ចឲ្យអនុវត្តការងារដកហូតឯកសាររដ្ឋបាលកម្ពុជាមិនប្រក្រតី ដែលជនបរទេសកំពុងកាន់កាប់ប្រើប្រាស់ និងការងារទទួលស្នើសុំជាជនបរទេសអន្តោប្រវេសន្តនៅក្នុងខេត្តស្វាយរៀង ប្រព្រឹត្តទៅដោយរលូន និងទទួលបានលទ្ធផលល្អប្រសើរ ស្របតាមច្បាប់ និងលិខិតបទដ្ឋានគតិយុត្ត ។

ជាមួយនេះ ឯកឧត្ដមអភិបាលរងខេត្ត ក្នុងនាមឯកឧត្ដមអភិបាលខេត្ត ក៏បានធ្វើការផ្ដាំផ្ញើដល់អស់លោក លោកស្រីជាមន្ត្រីជំនាញ មន្ត្រីអនុវត្តច្បាប់ សមត្ថកិច្ច និងអាជ្ញាធរដែលដីពាក់ព័ន្ធទាំងអស់ ត្រូវចូលរួមសម្របសម្រួល និងសហការឲ្យបានជិតស្និទ្ធប្រកបដោយការទទួលខុសត្រូវខ្ពស់ ជាមួយមន្រ្តីជំនាញអគ្គនាយកដ្ឋានអន្តោប្រវេសន៍ ដើម្បីអនុវត្តឲ្យបានជោគជ័យនូវអនុក្រឹត្យលេខ១២៩ និងដំណើការចុះដកហូតឯកសាររដ្ឋបាលកម្ពុជាមិនប្រក្រតីដែលកំពុងកាន់កាប់ដោយជនបរទេស ត្រូវអនុវត្តការងារនេះដោយប្រុងប្រយ័ត្ន ប្រកបដោយតម្លាភាព ដើម្បីធានាបាននូវការគាំទ្រពីប្រជាពលរដ្ឋក្នុងការអនុវត្តអនុក្រឹត្យនេះប្រកបដោយប្រសិទ្ធភាព ត្រូវចូលរួមសហការអនុវត្តឲ្យបានត្រឹមត្រូវ ស្របតាមច្បាប់ និងលិខិតបទដ្ឋានគតិយុត្តិផ្សេងទៀត ពាក់ព័ន្ធនឹងការគ្រប់គ្រងជនបរទេស ជាពិសេសប្រកាសស្ដីពីបែបបទ នីតិវិធី ការពិនិត្យ ការចុះបញ្ជីទទួលស្គាល់ជនបរទេសអន្តោប្រវេសន្តក្នុងព្រះរាជាណាចក្រកម្ពុជា ។ ជាចុងបញ្ចប់ ឯកឧត្ដមក៏បានសំណូមពរដល់លោក លោកស្រីមេឃុំ ចៅសង្កាត់ និងនាយប៉ុស្តិ៍នគរបាលរដ្ឋបាលទាំងអស់ មុននិងចេញលិខិតស្នាមរដ្ឋបាលផ្សេងៗ ជូនប្រជាពលរដ្ឋ សូមពិនិត្យឲ្យបានច្បាស់លាស់ ចៀសវាងនាំឲ្យមាននូវកំហុសឆ្គងផ្សេងៗ ដែលអាចនាំឲ្យមានផលវិបាកទៅថ្ងៃខាងមុខ ៕

 

 

 

 

 

 

 

កិច្ចប្រជុំបែងចែកភារកិច្ច និងការទទួលខុសត្រូវក្នុងការរៀបចំសន្និបាតបូកសរុបលទ្ធផលការងារប្រចាំឆ្នាំ ២០១៧ និងលើកទិសដៅការងារសម្រាប់អនុវត្តឆ្នាំ២០១៨

នាព្រឹកថ្ងៃសុក្រ ១២រោច ខែមិគសិរ ឆ្នាំរការ នព្វស័ក ព.ស ២៥៦១ ត្រូវនឹងថ្ងៃទី១៥ ខែធ្នូ ឆ្នាំ២០១៧នេះ នៅសាលប្រជុំសាលាខេត្ត ឯកឧត្ដម ហ៊ូ វតនៈ អភិបាលរង នៃគណៈអភិបាលខេត្ត និងជាប្រធានគណៈកម្មការខេត្តរៀបចំបុណ្យជាតិ-អន្តរជាតិ បានអញ្ជើញដឹកនាំកិច្ចប្រជុំបែងចែកភារកិច្ច និងការទទួលខុសត្រូវក្នុងការរៀបចំសន្និបាតបូកសរុបលទ្ធផលការងារប្រចាំឆ្នាំ ២០១៧ និងលើកទិសដៅការងារសម្រាប់អនុវត្តឆ្នាំ២០១៨ របស់រដ្ឋបាលខេត្ត និងការបែងចែកភារកិច្ច និងការទទួលខុសត្រូវក្នុងការរៀបចំមីទ្ទិញរំលឹកខួបអនុស្សាវរីយ៍លើកទី៣៩ នៃទិវាជ័យជម្នះ ៧មករា ។

អញ្ជើញចូលរួមក្នុងកិច្ចប្រជុំនេះ រួមមានលោក លោកស្រីនាយក នាយករងរដ្ឋបាលសាលាខេត្ត លោកស្នងការរងនគរបាលខេត្ត លោកមេបញ្ជាការរងកងរាជអាវុធហត្ថខេត្ត លោកមេបញ្ជាការរងតំបន់ប្រតិបត្តិការសឹករងស្វាយរៀង លោកសាកលវិទ្យាធិការរងសាកលវិទ្យាល័យស្វាយរៀង លោក លោកស្រីប្រធានមន្ទីរពាក់ព័ន្ធ លោក លោកស្រីនាយកទីចាត់ការ/ប្រធានអង្គភាពចំណុះសាលាខេត្ត និងមន្ត្រីជំនាញពាក់ព័ន្ធមួយចំនួន ៕

 

 

ព័ត៌មានថ្មីៗ

យុទ្ធសាស្ត្រចតុកោណ(ដ៣)

ចំនួនអ្នកទស្សនា

ថ្ងៃនេះ 0

ម្សិលមិញ 3

សប្តាហ៍ 15

ខែ 105

សរុប 5899